Finss.az - Dünya bazarlarında neft qiymətləri çərşənbə günü səhər saatlarında artımını davam etdirib.

İnvestorların diqqəti Yaxın Şərqdə artan gərginlik və ABŞ–İran münasibətlərinə yönəlib.

ICE birjasında Brent markalı neftin aprel fyuçersləri 0,8%-dən çox artaraq 67,9 dollar/barelə yüksəlib. NYMEX birjasında WTI nefti də 1%-ə yaxın bahalaşaraq 63,8 dollar/barel səviyyəsinə çatıb. Hər iki etalon marka əvvəlki sessiyanı da güclü artımla bağlamışdı.

Bazar iştirakçıları ABŞ hərbi qüvvələrinin İran dronunu vurması və Hörmüz boğazı yaxınlığında baş verən insidentlər fonunda geosiyasi riskləri qiymətləndirir. Analitiklər bildirir ki, hazırda neft qiymətlərində risk əlavəsi barel üzrə 5–10 dollar aralığında formalaşır.

Eyni zamanda treyderlər fevralın 6-na planlaşdırılan ABŞ–İran danışıqlarını gözləyir. Danışıqların keçirilmə yerinin Türkiyədən Omana dəyişdirilə biləcəyi bildirilir.

Qiymətlərə dəstək verən digər amil isə ABŞ-da neft ehtiyatlarının kəskin azalması ilə bağlı ilkin məlumatlar olub. API-nin hesablamasına görə, ehtiyatlar bir həftədə 11,1 milyon barel azalıb ki, bu da bazar proqnozlarından xeyli yaxşı göstəricidir.