Finss.az - Dünya bazarlarında neft qiymətləri çərşənbə axşamı da azalma trendini davam etdirir.

Kotirovkalar bir gün əvvəl son altı ayın ən kəskin enişindən sonra aşağı istiqamətdə qalır.

Londonun ICE Futures birjasında Brent markalı neftin aprel fyuçersləri 0,59% ucuzlaşaraq bir barel üçün 65,91 dollar təşkil edib. Bu kontraktlar əvvəlki sessiyada 4,36% və ya 3,02 dollar azalaraq 66,30 dollara düşmüşdü.

Nyu-Yorkun NYMEX əmtəə birjasında WTI markalı neftin mart fyuçersləri isə 0,50% geriləyərək bir barel üçün 61,83 dollara enib. Ötən ticarət günündə WTI qiymətləri 4,71% və ya 3,07 dollar azalaraq 62,14 dollar səviyyəsində bağlanmışdı.

Hər iki etalon marka bazar ertəsi günü son altı ayın ən böyük günlük enişini göstərib. Analitiklər bunu qlobal bazarlardakı ümumi satış dalğası ilə əlaqələndirir.

Qiymətlərə əlavə təzyiq yaradan amillərdən biri də geosiyasi gərginliyin nisbətən yumşalmasıdır. ABŞ və İranın Tehranın nüvə proqramı ətrafında diplomatik səyləri bərpa etmək üçün danışıqları yenidən başlatmağa hazırlaşdığı bildirilir. Bu isə Yaxın Şərqdən neft tədarükündə mümkün fasilələrlə bağlı narahatlıqları zəiflədib.