Finss.az xəbər verir ki, neft bazarı cümə axşamı günü yüksəliş nümayiş etdirib. ABŞ prezidenti Donald Trampın İrana qarşı səsləndirdiyi təhdidlər fonunda Brent markalı neftin qiyməti avqust ayından bəri ilk dəfə barel üçün 71 dollar həddini keçib.

Londonun ICE Futures birjasında mart ayı üçün Brent markalı neftin qiyməti Moskva vaxtı ilə saat 18:30-a olan məlumata görə, əvvəlki bağlanışla müqayisədə 2,29 dollar və ya 3,35% artaraq 70,69 dollar təşkil edib.

Eyni zamanda, Nyu-York Ticarət Birjasının (NYMEX) elektron ticarətində mart ayı üçün WTI markalı xam neftin fyuçersləri 2,03 dollar və ya 3,21% bahalaşaraq barel üçün 65,24 dollar səviyyəsinə yüksəlib.

Sessiyanın əvvəlində Brent markalı neftin qiyməti 71,89 dollar, WTI markalı neftin qiyməti isə 66,48 dollar səviyyəsinə qədər qalxıb. Ekspertlər neft qiymətlərindəki artımı geosiyasi risklər və qlobal enerji bazarındakı qeyri-müəyyənliklə əlaqələndirirlər.