Finss.az xəbər verir ki, bazar ertəsi günü müşahidə olunan güclü rallidən sonra çərşənbə axşamı səhər saatlarında qlobal neft bazarında qiymətlərdə ciddi dəyişiklik qeydə alınmayıb.

Londonun ICE Futures birjasında fevral ayı üçün Brent neft fyuçersləri Moskva vaxtı ilə saat 08:22-yə olan məlumata əsasən 0,01 dollar (0,02%) ucuzlaşaraq 61,93 dollar səviyyəsində ticarət olunub. Qeyd edək ki, əvvəlki ticarət sessiyasında Brent fyuçersləri 1,30 dollar (2,1%) bahalaşaraq 61,94 dollara yüksəlmişdi. Fevral müqavilələrinin ticarəti çərşənbə axşamı günü başa çatır. Daha aktiv ticarət edilən mart fyuçersləri isə 0,01 dollar azalaraq 61,48 dollara enib.

Nyu-York Ticarət Birjasının (NYMEX) elektron ticarətində fevral ayı üçün WTI xam neft fyuçersləri də oxşar dinamika nümayiş etdirib. Belə ki, qiymətlər 0,01 dollar (0,02%) azalaraq 58,07 dollar təşkil edib. Əvvəlki sessiyada isə WTI fyuçersləri 1,34 dollar (2,4%) artaraq 58,08 dollara yüksəlmişdi.

Hazırda bazarın diqqət mərkəzində əsasən geosiyasi xəbərlər dayanır. Xüsusilə Rusiya–Ukrayna münaqişəsinin mümkün həlli ilə bağlı qeyri-müəyyənlik bazarda risklərin artmasına səbəb olub. Məlumatlara görə, Ukraynanın Novqorod vilayətində yerləşən Rusiya prezidentinin iqamətgahına hücum cəhdi ilə bağlı xəbərlər fonunda gərginlik yenidən yüksəlib.

Rusiyanın xarici işlər naziri Sergey Lavrov bildirib ki, baş verən hadisələr fonunda Moskvanın danışıqlar mövqeyinə yenidən baxılması istisna edilmir. Ekspertlər hesab edirlər ki, geosiyasi risklərin artması yaxın dövrdə neft bazarında qiymət dalğalanmalarını gücləndirə bilər.