Finss.az xəbər verir ki, qlobal enerji bazarlarında neft qiymətləri iki həftəlik enişdən sonra bazar ertəsi səhəri artım nümayiş etdirib. Son günlərdə müşahidə olunan azalmadan sonra neft fyuçerslərində müsbət dinamika qeydə alınıb.

London ICE Futures Birjasında fevral ayı üçün Brent markalı neftin fyuçersləri Moskva vaxtı ilə saat 08:15-ə qədər 0,48 dollar və ya 0,79% artaraq barel üçün 60,95 dollara yüksəlib. Xatırladaq ki, ötən cümə günü Brent fyuçersləri 0,65 dollar (1,1%) bahalaşaraq 60,47 dollar səviyyəsində bağlanmışdı.

Eyni zamanda, Nyu-York Ticarət Birjasında (NYMEX) fevral ayı üçün WTI markalı neftin fyuçersləri bu vaxta qədər 0,46 dollar və ya 0,81% artaraq barel üçün 56,98 dollara çatıb. Əvvəlki sessiyada isə WTI müqavilələri 0,58 dollar (1%) artaraq 56,52 dollar səviyyəsində ticarət olunub.

Analitiklərin fikrincə, son artıma baxmayaraq, neft bazarında gələn il üçün təklif bolluğu ilə bağlı narahatlıqlar qalmaqda davam edir. Məhz bu amil son bir həftə ərzində həm Brent, həm də WTI markalı neftin qiymətlərinin təxminən 1% azalmasına səbəb olub. Qeyd olunur ki, bir həftə əvvəl isə hər iki marka üzrə qiymətlərdə təxminən 4%-lik eniş müşahidə edilmişdi.

Mütəxəssislər yaxın günlərdə neft qiymətlərinin dinamikasının qlobal iqtisadi göstəricilər, hasilatla bağlı qərarlar və bazarda təklif-tələb balansından asılı olacağını bildirirlər.