Finss.az - 2025-ci ilin əvvəlindən beynəlxalq investorlar ABŞ fond birjası fondlarına (ETF) 437 milyard dollar sərmayə qoyaraq, bu sahədə yeni rekord əldə ediblər.

Bu barədə analitik şirkət VettaFi məlumat yayıb. Maraqlıdır ki, maliyyə bazarlarında volatilliyin artmasına baxmayaraq, investorların ETF-lərə marağı zəifləməyib.

VettaFi-nin tədqiqatlar şöbəsinin rəhbəri Todd Rozenblyutun sözlərinə görə, “investorlar qiymətlərin düşməsini sərfəli alış fürsəti kimi görürlər”. The Wall Street Journal isə bildirir ki, investorların aktiv idarə olunan fondlardan vəsait çıxarıb daha aşağı komissiyalı və vergi güzəştləri təklif edən ETF-lərə yönəlməsi bu böyük sərmayə axınına səbəb olub.

Məlumata görə, əsas vəsait axını səhmlər və istiqrazlar ETF fondlarına olub. Xüsusilə, SP 500 indeksinə bağlı olan Vanguard Group fondu ilin əvvəlindən 65 milyard dollar toplayaraq dünyanın ən böyük ETF fondu kimi mövqeyini möhkəmləndirib. Keçən il 116 milyard dollar sərmayə cəlb edən bu fond, cari temp davam edərsə, 2025-ci ilin oktyabrına qədər yeni rekord qırmağa hazırlaşır.

Vanguard-ın baş investisiya direktoru Qreq Devis bildirib ki, aprel ayında alqı-satqı nisbəti 5-ə 1 olmuş və investorlar yüksək nağd vəsait ehtiyatı toplayaraq aktivləri almağa hazırdırlar.

Eyni zamanda, BlackRock-un rəhbəri Lerri Fink may ayında pul bazarı fondlarının idarə etdiyi vəsaitlərin ümumi həcmini 11 trilyon dollar olaraq qiymətləndirib. Bu vəsaitlərin bir qismi yaxın gələcəkdə səhmlər və istiqrazlara yönələ bilər.