Finss.az - ABŞ fond bazarı çərşənbə günü kəskin enişlə bağlanıb. İndekslərin azalmasına əsas səbəb ABŞ Maliyyə Nazirliyinin 20 illik dövlət istiqrazlarının hərracında zəif nəticələr göstərməsi olub.

Nazirlik 16 milyard dollarlıq istiqrazı 5% illik gəlirlə yerləşdirsə də, bu faiz 2020-ci ildən bəri ən yüksək göstərici hesab olunur. Tələbin aşağı olması isə investorlar arasında narahatlıq yaradıb.

Hərracdan sonra 30 illik istiqrazların gəlirliliyi 11 baza bəndi artaraq 2023-cü ilin oktyabrından bəri rekord səviyyəyə çatıb.

"20 illik istiqrazların zəif nəticəsi bazarda təzyiq yaratdı. Moody's agentliyinin ABŞ-ın kredit reytinqini aşağı salmasından sonra bu həssaslıq həftə boyunca davam edir," – deyə JonesTrading şirkətindən analitik Maykl O'Rurk bildirib.

Bundan əlavə, Konqresdə prezident Donald Tramp tərəfindən irəli sürülən və vergi yüklərinin 3-5 trilyon dollar azalmasına səbəb ola biləcək qanun layihəsi də büdcə ilə bağlı narahatlıqları artırır. Keçmiş maliyyə naziri Stiven Mnuçin də məsələ ilə bağlı fikirlərini bildirib: “Büdcə kəsiri mənim üçün xarici ticarət kəsirindən daha ciddi problemdir. Ümid edirəm ki, xərcləri azaltmaq mümkün olacaq.”

Şirkət xəbərləri və bazar reaksiyası:

• Take-Two Interactive Software səhmləri əlavə emissiya planına görə 4,5% ucuzlaşıb.

• Palo Alto Networks şirkəti gəlirlərini artırsa da, səhmləri 6,8% dəyər itirib.

• Toll Brothers analitik proqnozlarından yaxşı nəticə göstərməsinə baxmayaraq, səhmləri 0,4% enib.

• Target Corp. 2,8% gəlir itkisinə baxmayaraq xalis mənfəətini artırıb, amma səhmlər 5,2% aşağı düşüb.

• Northrop Grumman dividendləri 12% artırsa da, səhmləri 0,6% ucuzlaşıb.

• Wolfspeed Inc. 59% bazar dəyəri itkisinə məruz qalıb. Şirkətin yaxın zamanda iflas üçün sənəd təqdim edəcəyi bildirilir.

İndeks nəticələri:

• Dow Jones Industrial Average 1,91% azalaraq 41,860.44 bəndə geriləyib. Ən çox dəyər itirənlər UnitedHealth Group (-5,8%) və Nike Inc. (-4,2%) olub. Yeganə müsbət nəticə göstərən isə Coca-Cola Co. olub (+0,15%).

• SP 500 1,61% azalaraq 5844,61 bənd olub.

• Nasdaq Composite 1,41% geriləyərək 18872,64 bənd təşkil edib.