Finss.az – ABŞ və Çin arasında 90 günlük qarşılıqlı ticarət rüsumlarının azaldılması barədə əldə olunmuş razılaşma beynəlxalq maliyyə bazarlarında nikbinlik yaradıb.

Bu addım fond indekslərində kəskin artım ilə nəticələnib.

Bazar ertəsi günü Dow Jones Industrial Average indeksi 1160,72 bənd və ya 2,8% artaraq 42 410,1 bəndə, SP 500 isə 3,3% yüksələrək 5844,19 bəndə çatıb. Nasdaq Composite indeksi isə 4,35% artaraq 18 708,34 bəndlə sessiyanı tamamlayıb.

Məlumata görə, Vaşinqton Çin məhsullarına tətbiq olunan tarifləri 145%-dən 30%-ə, Pekin isə ABŞ məhsullarına tətbiq edilən rüsumları 125%-dən 10%-ə endirəcək. Dəyişikliklər 14 may tarixindən qüvvəyə minəcək.

ABŞ Maliyyə naziri Skott Bessent bildirib ki, danışıqlar “məhsuldar” keçib. Çin Baş nazirinin müavini Xe Lifən isə bildirib ki, tərəflər “vacib konsensusa” gəliblər və “bərabərhüquqlu dialoq” vasitəsilə fikir ayrılıqlarının həlli yolunda əhəmiyyətli addım atılıb.

Mütəxəssislər bu razılaşmanı ticarət müharibəsində gərginliyin azaldılması kimi qiymətləndirir. Plurimi Wealth-in investisiya direktoru Patrik Armstronq qeyd edib ki, struktur fərqlər hələ də qalır, lakin bu addım resessiya riskinin qarşısını almağa kömək edə bilər.

Şirkət səhmlərində güclü artım

Ticarət gərginliyinin azalması ilə əlaqədar olaraq texnologiya və sənaye nəhənglərinin səhmlərində əhəmiyyətli yüksəliş müşahidə olunub:

• Amazon.com Inc. – +8,1%

• Nike Inc. – +7,3%

• Apple Inc. – +6,3%

• Tesla – +6,8%

• Alphabet Inc. – +3,7%

• Microsoft Corp. – +2,4%

Enerji sektoru da diqqət mərkəzində olub. NRG Energy səhmləri 26,2% bahalaşaraq SP 500 indeksində lider olub. Şirkət LS Power şirkətindən enerji istehsalı aktivlərini satın aldığını və birinci rübdə xalis mənfəətini 47% artıraraq 750 milyon dollara çatdırdığını açıqlayıb.

Çip istehsalçıları və maliyyə sektoru da yüksəldi

Yüksəlişdən faydalanan digər sektorlar bunlardır:

• Nvidia Corp. – +5,4%

• Broadcom – +6,4%

• Advanced Micro Devices – +5,1%

• Texas Instruments – +8,7%

• Microchip Technology – +10,2%

Bank və investisiya qurumları da müsbət dinamikaya qoşulub:

• JPMorgan Chase Co. – +2,8%

• Goldman Sachs Group – +4,3%

• Blackstone Inc. – +6,9%

• Carlyle Group – +8,5%

• Bank of America Corp. – +3,8%