Finss.az - Çərşənbə günü Avropa fond bazarları qarışıq istiqamətdə ticarət olunub.

İnvestorlar ABŞ və Çin arasında ticarət danışıqlarının yenidən başlaması ilə bağlı xəbərləri qiymətləndirir, eyni zamanda Federal Ehtiyat Sisteminin (FED) pul-kredit siyasəti ilə bağlı qərarını gözləyirlər.

Almaniyanın DAX indeksi 0,1% artıb. Fransa üzrə CAC 40 indeksi 0,3%, Böyük Britaniyanın FTSE 100 indeksi isə 0,2% geriləyib.

ABŞ Maliyyə Naziri Skott Bessent və Ticarət Nümayəndəsi Ceymison Qririn bu həftə İsveçrədə Çinli həmkarları ilə danışıqlar aparacağı xəbəri bazarlarda nikbinlik yaradıb. Bu görüş, uzun müddətdir davam edən ticarət gərginliyinin azaldılacağına dair ümidləri artırıb.

Digər tərəfdən, Çinin Mərkəzi Bankı bank ehtiyat normalarını aşağı salacağını və iqtisadiyyata əlavə likvidlik daxil edəcəyini açıqlayıb.

İnvestorlar bu gün FED-in aprel ayından bəri ilk iclasının nəticələrini gözləyirlər. Gözləntilərə əsasən faiz dərəcələri sabit saxlanacaq. Bununla belə, FED sədri Cerom Pauellin açıqlamaları faiz siyasətinin gələcəyi baxımından xüsusi diqqət mərkəzində olacaq.

Avropanın aparıcı şirkətləri də bu gün maliyyə nəticələrini açıqlayıb:

• Novo Nordisk birinci rübdə mənfəətini artırsa da, arıqlama dərmanı Wegovy-yə tələbatın azalması səbəbindən illik satış artımı proqnozunu azaldıb.

• BMW 2025-ci il proqnozunu təsdiqləyib və iyuldan bəzi idxal tariflərinin azaldılacağını gözlədiyini bildirib.

• Siemens Healthineers mənfəətində 25% artım elan etsə də, tarif təzyiqlərinə görə illik proqnozunu yeniləyib.

• Legrand ABŞ-ın Çin məhsullarına tətbiq etdiyi tariflərin şirkətə 150–200 milyon dollar arası maliyyə təsiri göstərəcəyini açıqlayıb.

• Orsted isə gözləniləndən güclü nəticələrə baxmayaraq, dəniz külək enerjisi sektorundakı çətinliklər səbəbilə Böyük Britaniyadakı Hornsea 4 layihəsindən imtina edib.