Finss.az - Çərşənbə axşamı səhər saatlarında neftin dünya bazarındakı qiymətləri əvvəlki sessiyada baş verən kəskin enişdən sonra zəif bərpa olunur.

Londonun ICE Futures birjasında Brent markalı neftin mart fyuçersləri $0,31 (0,4%) artaraq $77,39 səviyyəsinə yüksəlib. Ötən gün bu kontraktlar $1,42 (1,8%) ucuzlaşaraq $77,08 olmuşdu. WTI markalı neftin mart fyuçerslərinin qiyməti isə $0,29 (0,4%) bahalaşaraq $73,46-a çatıb. Bazar ertəsi bu fyuçerslər $1,49 (2%) enərək $73,17-ə düşmüşdü.

ABŞ və Kolumbiya arasında gömrük rüsumları ilə bağlı gərginlik də neft bazarına təsir göstərir. Prezident Donald Tramp, Kolumbiya hökumətinin qeyri-qanuni miqrantları qəbul etməməsi səbəbindən bu ölkədən idxal edilən bütün mallara 25%-lik rüsum tətbiq edilməsi göstərişi vermişdi. Lakin rüsumun tətbiqi müvəqqəti olaraq təxirə salınıb, çünki Kolumbiya Vaşinqtonun bütün şərtlərini qəbul edib.

Kolumbiya ABŞ üçün əsas neft tədarükçülərindən biridir və gündəlik 200 min bareldən çox neft ixrac edir. Analitiklər bildirirlər ki, bu addım qısamüddətli perspektivdə neft qiymətlərini artırsa da, Kanada və Meksikaya qarşı potensial ticarət məhdudiyyətləri qlobal iqtisadiyyata, xüsusilə də Çinə mənfi təsir göstərə bilər.

Bazar ertəsi günü ABŞ fond bazarının çöküşü də neft qiymətlərinin enməsinə təsir edib. Nasdaq Composite indeksi 3%-dən çox geriləyib, Nvidia-nın səhmləri isə 17% ucuzlaşaraq şirkətin bazar dəyərini bir gündə $600 milyard azaldıb.

Bu azalmanın əsas səbəbi Çin startapı DeepSeek-in süni intellekt texnologiyalarında əldə etdiyi uğurlar olub. DeepSeek-in AI modeli rəqiblərindən daha səmərəli işləyir və daha az enerji sərf edir.

Analitiklərin fikrincə, süni intellekt və data mərkəzlərinin böyük enerji tələbatı ilə bağlı gözləntilər enerji bazarına dəstək verirdi. Lakin DeepSeek-in texnologiyasının daha az enerji tələb etməsi neft və digər enerji resurslarının qiymətlərinə mənfi təsir göstərə bilər.