Nvidia Baş Direktoru Jensen Huang iyulda 322,7 milyon dollarlıq səhmlər satıb

Finss.az xəbər verir ki, bu barədə Bloomberg, ABŞ Qiymətli Kağızlar və Birjalar Komissiyasına (SEC) təqdim edilmiş sənədlərə istinadən məlumat verib.

Huang, iyun ayında da Nvidia səhmlərini satıb və ümumi satışın məbləği təxminən 500 milyon dollar təşkil edib. Bu satışlar, ABŞ Qiymətli Kağızlar və Birjalar haqqında Qanunun 10b5-1 qaydasına uyğun olaraq mart ayında qəbul edilmiş ticarət planı çərçivəsində həyata keçirilib. Qayda şirkətlərin insayderlərinə ticarət planı hazırlamaqla insayder ticarəti ittihamlarından qaçmağa imkan verir. Nvidia-nın nümayəndəsi mövzu ilə bağlı şərh verməkdən imtina edib.

Nvidia səhmlərinin satış üçün ən əlverişli vaxtı seçdiyi bildirilir. İyun-iyul aylarında süni intellektə olan investor marağı fonunda səhmlərin dəyəri artaraq 20 iyunda maksimum 140,76 dollara çatıb. Lakin 5 avqusta qədər olan müddətdə səhmlərin dəyəri 28,6% azalaraq 100,45 dollar olub. 6 avqustda səhmlərin dəyəri 2,72% artıb.

Son üç ticarət sessiyasında Nvidia səhmlərinin dəyəri qlobal fond bazarlarında böyük satış dalğası fonunda 14% azalıb. Nasdaq 100 indeksi may ayından bəri ən aşağı səviyyəyə düşərkən 6,4% eniş baş verib.

Jensen Huang, Forbes Real-Time Billionaire qlobal reytinqində 14-cü yerdədir. Onun sərvəti 6 avqust tarixinə 88,2 milyard dollar olaraq qiymətləndirilir və bir gün ərzində 5,9 milyard dollar (-6,28%) azalıb.

İyun ayında Nvidia, Microsoft-u keçərək dünyanın ən dəyərli şirkətləri siyahısında birinci yerə çıxıb. Bu, 2019-cu ildən bəri Microsoft və ya Apple-dan fərqli bir şirkətin birinci yerə çıxması hadisəsidir. 6 avqust tarixinə görə isə o, kapitalizasiya baxımından hər iki şirkətdən geri qalaraq üçüncü yerdədir. Bu məlumat TradingView-dən əldə olunub.