Cümə axşamı Avropada qazın qiyməti 1000 kubmetr üçün təxminən 2000 dollara düşüb.

ICE London Fond Birjasının məlumatına görə, qiymət iyulun sonundan bəri ilk dəfə 2000 dollara düşüb.

Oktyabr fyuçerslərinin dəyəri 1000 kubmetr üçün 2028 dollara geriləyib (MVt/saat üçün 196,05 avro).

Qazın qiymətinin aşağı düşməsi Avropa anbarlarında (UGS) qaz ehtiyatlarının maksimuma yaxınlaşması ilə əlaqədardır - indi anbarlar məcmu olaraq 82,5% doldurulur. Əvvəllər Avropa İttifaqı ölkələri 2022-2023-cü illərin qışına qədər UGS obyektlərini ən azı 80% və sonrakı bütün qış dövrlərində isə 90% doldurmağı öhdəsinə götürmüşdülər.

Eyni zamanda “Şimal axını” hələ də dayandırılıb. Sentyabrın 2-də “Qazprom” xəbər verib ki, “Şimal axını”nda işləyən sonuncu qaz nasos qurğusuna texniki qulluq zamanı yağ sızması aşkar edilib, buna görə holdinq qaz kəməri ilə nəqli tamamilə dayandırmağa məcbur olub. Siemens-in məlumatına görə, mühərriklərdə yağ sızmasının tamamilə aradan qaldırılması ixtisaslaşmış təmir ilə mümkündür.

"Qazprom”un rəhbəri Aleksey Miller bildirib ki, “Siemens” sanksiyalara görə “Şimal axını”ndakı nasosları müntəzəm təmir edə bilmir.