21 aprel 2022-ci il tarixində Bakı Fond Birjasının (BFB) Listinq Komitəsinin qərarı ilə "Bank Respublika" ASC-nin ümumi dəyəri 15 milyon manat olan istiqrazları standart bazar seqmentində listinqə daxil edilib.
Birjadan "Fins.az"a daxil olmuş məlumata görə, faizli təmin edilməmiş sənədsiz adlı istiqrazların sayı 15 min ədəd, hər birinin nominal dəyəri 1000 manat, illik faiz dərəcəsi 8,5%, tədavül müddəti 2 il, kupon faizlərinin ödəniş müddəti 6 aydan birdir.
Qeyd olunan istiqrazların yerləşdirilməsi Bakı Fond Birjasında rəqabətli hərrac üsulu ilə həyata keçiriləcəkdir.
Yerləşdirmənin başlanmasına ən azı 2 iş günü qalmış hərracın baş tutacağı tarix BFB-nin internet səhifəsində investorlara açıqlanacaqdır.
Yerləşdirmə üzrə anderrayter “ABB-İnvest İnvestisiya Şirkəti” QSC-dir.
Xatırladaq ki, 16 dekabr tarixində Bakı Fond Birjasında "Bank Respublika" ASC-nin kapital bazarlarında ilk istiqraz buraxılışı - 10 milyon manatlıq istiqrazlarının yerləşdirilməsi baş tutumuşdu. Hərrac zamanı "Bank Respublika"nın emissiya etdiyi istiqrazlara investorlar tərəfindən göstərilən böyük maraq müşahidə olunub və keçirilmiş hərracda tələb təklifi 30% üstələyərək 12 milyon 980 min manat təşkil etmişdi.
18 fevral 2022-ci il tarixində Bakı Fond Birjasında “Bank Respublika”-nin ümumi dəyəri 15 milyon manat olan istiqrazlarının yerləşdirilməsi üzrə hərrac yekunlaşmışdı. Bu hərrac zamanı da Bankın emissiya etdiyi istiqrazlara investorlar tərəfindən göstərilən böyük maraq müşahidə olunmuş və keçirilmiş hərracda tələb təklifi 15,2% üstələyərək 17 milyon 283 min manat təşkil etmişdi.
