Rusiyanın iri qızıl hasilatçısı, Rusiya, Qazaxıstan, Kanada, Burkina Faso və Qvineyada doqquz mədənə sahib olan və təsdiq edilmiş qızıl ehtiyatlarının həcmi 33 milyon unsiya təşkil edən NordGold bu həftə London birjasında listinqə çıxmaq (İPO - Səhmlərin İlkin Kütləvi Yerləşdirilməsi) üçün sənədlərini təqdim edəcək.

Fins.az xəbər verir ki, Moskva birjasında da qeydiyyatdan keçmiş şirkət IPO vasitəsilə səhmlərinin 25%-ni satmaq niyyətindədir.

Qızıl qiymətləri martdan bəri 10% artaraq, bir unsiyaya görə 1906 dolları keçib. İnvestorların artan inflyasiya qarşısında hedc vasitəsi kimi bu qiymətli metalı daha çox həcmdə alması da qiymət artımına təkan verir. İri qızıl hasilatçılarının səhmlərini izləyən NYSE Area Gold Bugs indeksi son 3 ayda 29 faiz yüksəlib.

NordGold Şimali Amerikadakı rəqibləri ilə müqayisədə daha yüksək dividendlər (bu il 400 milyon dollar) ödəməklə investorları cəlb etməyə ümid edir. Hazırda Rusiyanın Uzaq Şərq bölgəsində iki qızıl yatağını istismar edən şirkət növbəti 5 il ərzində burda hasilatı 20% artıracağına əmindir. Dünyanın ən iri qızıl hasilatçısı, ABŞ-ın Newmont Goldcorp şirkəti isə 2025-ci ilə qədər hasilatı sabit səviyyədə saxlayacaq.

NordGold hazırda ildə 1 milyon unsiya qızıl istehsal edir. Şirkətin ötən ilki EBITDA-sı (faiz, vergi öhdəlikləri və amortizasiya xərclərindən öncəki gəlirləri) 1 milyard dolları keçib. Rusiyanın ən böyük istehsalçısı, London birjasının üzvü və bazar dəyəri 82 milyard funt-sterlinq (116,15 milyard dollar) təşkil edən Polimetal 2020-ci ildə 1,4 milyon unsiya, bazarda ən böyük payçılardan biri Endavour isə 1,5 milyon unsiya qızıl hasil edib.