Bütün dünyada əmtəə qiymətlərinin sürətlə bahalaşması fonunda analitiklər xüsusilə ən çox istifadə olunan metallardan olan misin qiymət artımının daha sürətlə getdiyinə diqqət çəkirlər.
Fins.az bununla əlaqədar xarici ekspertlərin gözləntilərini araşdırıb.
Bank of America-nın əmtəələr üzrə strateji analitiki Maykl Uidmer öz qeydlərində misin anbarlardakı həcminin 15 il öncəki göstərici ilə təxminən eyni olduğunu bildirib. Hazırda son 10 ildəki ən yüksək qiymətinə - bir tona görə 10 min dollara çatan bu metalın gələn il 13 min dollara çatacağı istisna edilmir: “Qlobal iqtisadiyyatın pandemiyadan sonra özünə gəlməyə başlaması və əksər istehsal sahələrinin bərpası ən çox işlənən metallardan biri olan misə də tələbatı görünməmiş dərəcədə artırıb. Lakin təchizat zəncirindəki problemlər tələb-təklif tarazlığını saxlaya bilmir və nəticədə biz həm bu il, həm də növbəti il qiymət artımını müşahidə edəcəyik.”
Uidmer həmçinin, volatillik səbəbindən metal qiymətlərində artımın ilk belə hal olmadığını qeyd edib və 2006-2007-ci illərdə London Metal Birjasında nikel qiymətlərinin anbarlardakı qıtlıq səbəbindən 300%-ə qədər bahalaşmasına diqqət çəkib. 2021-2022-ci illərdəki defisitlərdən sonra, Bank of America ekspertləri mis bazarının 2023-2024-cü illərdə nisbətən tarazlaşacağını, lakin daha sonra - 2025-ci ildə misin yenidən yüksələn xətlə bahalaşaraq, bir tona görə 20 min dollara çatacağını proqnozlaşdırır.
ABŞ-ın hedc fondu Livermore Partners-in təsisçisi və idarəçi direktoru David Neuhauser bir sıra sürətlə inkişaf edən sənaye sektorlarında, o cümlədən elektrikli avtomobil batareyalarının və yarımkeçirici hissələrin istehsalında əsas xammalardan biri olmasına görə misin qiymətinin artmaqda davam edəcəyinə əmindir. “Fikrimcə, mis sənayenin “yeni nefti”dir və növbəti 5-10 il ərzində qiymətinin bir tona görə 20 min dolları keçəcəyi şübhəsizdir”.
Əksər əmtəə qiymətləri apel ayında 3% bahalaşaraq, ötən ilin aprelindən bəri bu artımın həcmini 80%-ə çatdırıb. HSBC bankının analitikləri dünənki qeydlərində xüsusilə misə tələbatın və nəticədə qiymətin artan templə yüksələcəyini proqnozlaşdırır.