Avropa Mərkəzi Bankı (ECB) Fransada yerləşən beynəlxalq bank və investisiya qrupu Crédit Agricole-i iqlim və ətraf mühit (CE) risklərinin qiymətləndirilməsində təyin edilmiş müddəti pozduğu üçün 7,5 milyon avro (təxminən 9 milyon ABŞ dolları) məbləğində cərimələyib.

ECB qeyd edir ki, bu, iqlim riskləri ilə bağlı banklara tətbiq olunan ikinci cərimədir; 2025-ci ilin noyabrında İspaniyanın ABANCA bankı materiallıq qiymətləndirməsini həyata keçirmədiyi üçün 187,650 avro cərimə olunmuşdu.

Crédit Agricole-ə tətbiq olunan cərimə 31 may 2024-cü il tarixinə qədər CE risklərinin materiallıq qiymətləndirilməsini aparmaq üçün təyin edilmiş müddətin 75 gün pozulması səbəbindən verilib. ECB bildirir ki, cərimənin məbləği pozuntu müddəti, pozuntunun əhəmiyyəti və bankın gündəlik dövriyyəsi nəzərə alınaraq müəyyən edilir.

Bankın açıqlamasında qeyd olunub ki, Crédit Agricole ECB-nin qərarını qəbul edir, amma onu “təmamilə inzibati” hesab edir. Bank vurğulayıb ki, cərimə yalnız ECB-nin tələbinə cavab vaxtına aiddir və o, iqlim və enerji keçidi üzrə öhdəliklərini tam yerinə yetirir.

ECB isə iyul 2025-ci ildə ABŞ banklarının iqlim və təbiət risklərini idarəetmədə əhəmiyyətli irəliləyiş əldə etdiyini, lakin bəzi sahələrdə təkmilləşdirmə ehtiyacı olduğunu açıqlamışdı. Bu il ECB bankların yaşıl iqtisadiyyata keçid planlarını və iqlim dəyişikliyinin fiziki təsirlərinə hazırlıqlarını qiymətləndirmək üçün nəzarət fəaliyyətini gücləndirəcəyini bildirib.