Azərbaycanda banklar 2021-ci ildən etibarən əsas maliyyə göstəriciləri üzrə ən nəzərəçarpan yaxşılaşmanı nümayiş etdiriblər. Bu dinamika bank sektorunda milli valyutada kreditləşmənin genişlənməsi, eləcə də borcalanların ödəmə qabiliyyəti üzrə meyarların sərtləşdirilməsi ilə əlaqələndirilir.

Finss.az “Fitch Ratings” agentliyinin məlumatına əsasən xəbər verir ki, aktivlərin “irsi” keyfiyyəti ilə bağlı risklərin azalması ölkənin bank sektorunun gəlirliliyini dəstəkləyib. Bildirilir ki, kreditləşmənin sürətli artımı və dividendlərin ödənilməsi kapital buferlərinin azalmasına səbəb olsa da, agentlik 2026-cı ildə kapitallaşma səviyyəsinin ümumilikdə sabit qalacağını proqnozlaşdırır. Bu sabitliyə kifayət qədər gəlirlilik və aktivlərin mülayim artımı töhfə verəcək.

Hesabatda qeyd olunur ki, Azərbaycanda xarici valyutada kreditlərin payı aşağı səviyyədə qalır və 2025-ci ilin doqquz ayının sonuna 14% təşkil edib. Bu göstərici Azərbaycan manatının ABŞ dollarına faktiki bağlılığı və valyuta kreditləşməsi üzrə tətbiq edilən sərt tənzimləmələrlə izah olunur.

Eyni zamanda vurğulanır ki, Azərbaycan banklarının reytinqləri ölkənin suveren reytinqindən (BBB- / “sabit” proqnoz) aşağıdır. Bu, agentliyin bankların müstəqil maliyyə profilləri və əməliyyat mühitinə (bb- / sabit) verdiyi qiymətləndirməni əks etdirir.

“Fitch Ratings”in hesabatında bildirilib ki, tənzimləmənin daha da gücləndirilməsi və dayanıqlı maliyyə göstəricilərinin qorunması Azərbaycanda bankların reytinqlərinin yüksəlməsi üçün imkanlar yarada bilər.

Fuad Mədətov
Finss.az