Valyuta bazarındakı sabitlik qiymət sabitliyinin təmin edilməsində mühüm rol oynamağa davam edir.

Finss.az Azərbaycanın Mərkəzi Bankının məlumatına əsasən xəbər verir ki, 2025-ci il ərzində mübadilə şöbələri tərəfindən nağd xarici valyutanın alışı satışı 423 milyon ABŞ dolları üstələyib.

Məlumata görə, rezident fiziki şəxslərin əmanətlərinin dollarlaşma səviyyəsi 2025-ci ildə 2,6 faiz bəndi azalaraq 28%-ə enib. Bu göstərici məzənnə ilə bağlı gözləntilərin nikbin olduğunu göstərir.

Qeyd olunub ki, mövcud şəraitdə 2025-ci ildə Azərbaycan Mərkəzi Bankının valyuta ehtiyatları 5,1% artaraq 11,5 milyard ABŞ dollarına çatıb.

Məlumatda vurğulanır ki, valyuta bazarında tarazlığın formalaşmasında həlledici rol oynayan xarici sektor göstəriciləri əlverişli olaraq qalır. Gömrük statistikasına əsasən, 2025-ci ildə ölkənin xarici ticarətində 0,7 milyard ABŞ dolları məbləğində müsbət saldo qeydə alınıb.

İlkin qiymətləndirmələrə görə, qızıl idxalı çıxılmaqla xarici ticarətdə müsbət saldo 6,9 milyard ABŞ dollarını ötüb.

AMB-nin yenilənmiş makroiqtisadi proqnozlarına əsasən, 2026 və 2027-ci illərin sonuna cari əməliyyatlar hesabının profisitli qalacağı gözlənilir.

Fuad Mədətov
Finss.az