Asiya İnkişaf Bankı (AİB) Qafqaz və Mərkəzi Asiya ölkələri üzrə 2025–2026-cı illərin iqtisadi artım və inflyasiya proqnozlarını yeniləyib.

Finss.az xəbər verir ki, 2025-ci il üçün iqtisadi artım 5,8%, 2026-cı il üçün isə 5% səviyyəsində qiymətləndirilir. Qeyd olunur ki, sentyabr 2025-ci il qiymətləndirmələrində müvafiq göstəricilər 5,5% və 4,9% olub. Proqnozun artırılması Qazaxıstanda güclü iqtisadi fəallıq, dövlət investisiyaları, pul köçürmələrinin artması, dayanıqlı daxili tələbat və sabit makroiqtisadi şəraitlə izah edilir.

Hesabatda inflyasiya proqnozları da yenilənib: 2025-ci il üçün 7,7%-dən 8%-ə, 2026-cı il üçün isə 6,6%-dən 7,1%-ə yüksəldilib. Qazaxıstan və Qırğızıstanda ərzaq, xidmət və kommunal tariflərin bahalaşması inflyasiyanı artırsa da, Tacikistanda idxal inflyasiyasının yumşalması və vergi güzəştləri fonunda inflyasiya nisbətən aşağı qalacaq.

Ermənistan, Azərbaycan, Gürcüstan, Türkmənistan və Özbəkistanda isə sabit xammal bazarları və düşünülmüş iqtisadi siyasət nəticəsində inflyasiya nəzarətdə saxlanılır.