Asiya İnkişaf Bankı (AİB) “Mərkəzi, Qərbi, Şərqi və Cənubi Asiya subregionlarında investisiyalara və iqtisadi artıma dəstək” layihəsi üzrə texniki yardımın başa çatması ilə bağlı hesabat dərc edib. Hesabat ticarət kreditləri və investisiyaların zəmanətinin çoxşaxəli sığortalanması agentliyinin (TCIGA) yaradılması imkanlarının genişmiqyaslı araşdırılmasını əhatə edir.
Finss.az AİB-yə istinadən xəbər verir ki, layihə 2018-ci ilin oktyabrından 18 inkişaf etməkdə olan AİB üzv ölkəsi arasında regiondaxili və regionlararası ticarətin, eləcə də birbaşa xarici investisiyaların cəlb olunması və ixracın şaxələndirilməsi üçün agentliyin yaradılması imkanlarını öyrənib. Bu ölkələr sırasında Azərbaycan, Ermənistan, Gürcüstan, Qazaxıstan, Hindistan, Çin və digər Asiya ölkələri yer alır.
Layihə iki mərhələdə həyata keçirilib:
- Birinci mərhələdə agentliyin yaradılmasının mümkünlüyü uğurla qiymətləndirilib.
- İkinci mərhələ – ölkələrdə məsləhətləşmələr və qarşılıqlı anlaşma memorandumu imzalanması – isə vaxt çatışmazlığı və layihə rəhbərliyindəki dəyişikliklər səbəbindən ləğv olunub.
Hesabatda layihənin maliyyə göstəriciləri və nəticələri belədir:
- İlkin təsdiqlənmiş büdcə: 2,3 milyon ABŞ dolları
- Yenilənmiş büdcə: 3,35 milyon ABŞ dolları
- Faktiki xərclənən məbləğ: 1,89 milyon ABŞ dolları
- İstifadə olunmamış qalıq: 1,46 milyon ABŞ dolları
- Büdcənin mənimsənmə səviyyəsi: 56,5%
- Layihənin tamamlanma tarixi: 14 avqust 2024-cü il
Tədqiqat agentliyin təsir potensialını, idarəetmə və hüquqi mexanizmlərini, eləcə də müxtəlif biznes inkişaf ssenarilərini geniş təhlil edib. Proqnozlara görə, TCIGA yaradıldıqda ixrac, ÜDM, məşğulluq və sosial göstəricilər üzrə müsbət dəyişikliklər gözlənilir.
AİB vurğulayıb ki, layihənin nəticələri ticarətin maliyyələşdirilməsi və investisiyaların qorunması sahəsində gələcək regional təşəbbüslər üçün dəyərli təməl rolunu oynayır və TCIGA-nın yaradılması istiqamətində növbəti addımlar üçün imkanlar açır.
Qeyd edək ki, TCIGA-nın yaradılması ideyası ilk dəfə 2017-ci ildə Gürcüstanın Tbilisi şəhərində keçirilən regional əməkdaşlıq forumunda irəli sürülüb.