Finss.az - İsveçrənin UBS Group AG bankı ölkədə hökumətin təklif etdiyi bank islahatı çərçivəsində əlavə olaraq 26 milyard ABŞ dollarına qədər kapital ayırmalı olacaq.

Bu məbləğ əvvəlki proqnozlardan yüksəkdir və bank ilə dövlət arasında münasibətlərin gərginləşməsinə səbəb ola bilər.

Bloomberg-in məlumatına görə, UBS rəhbərliyi islahatları "Credit Suisse-in çökməsinə reaksiyada həddindən artıq tədbir" kimi qiymətləndirir və əgər bu dəyişikliklər qəbul olunarsa, bank mərkəzini İsveçrədən başqa ölkəyə köçürməyi düşünür.

İyunun 6-da açıqlanan reform layihəsində UBS-ə ən çox yük gətirəcək məqam xarici filiallar üçün kapital ehtiyatlarının artırılmasıdır. Yeni qaydalara əsasən, banklar xaricdəki aktivlərin 100%-i həcmində ehtiyatları ölkə daxilində saxlamalıdırlar. Hazırda bu rəqəm 60% təşkil edir.

Hökumətin hesablamalarına görə, yalnız bu maddə UBS-in əlavə 23 milyard dollar kapital ayırmasını tələb edəcək.

İsveçrə hökuməti bildirir ki, bu islahat UBS-i böhran zamanı daha çevik və dayanıqlı edəcək: "Xarici filiallarla bağlı təklif bankın onları tam və ya qismən ayıraraq ana bankın kapitalına zərər vermədən fəaliyyətini davam etdirməsinə imkan verəcək."

Bundan əlavə, dövlət qurumları qeyd edir ki, kapitalın artırılması mümkün qədər əlavə maliyyə cəlb etmədən, bankın üzvi inkişafı və səhmdarlara dividendlərin məhdudlaşdırılması olmadan reallaşdırıla bilər.