Ötən il Yaponiyanın Azərbaycan iqtisadiyyatına cəlb etdiyi birbaşa xarici investisiyaların həcmi 180,639 milyon ABŞ dolları təşkil edib.

Finss.az Azərbaycan Mərkəzi Bankına istinadən xəbər verir ki, bu göstərici 2023-cü illə müqayisədə 13,213 milyon ABŞ dolları və ya 6,8% azalıb.

Hesabat ilində Azərbaycana yönəldilən ümumi birbaşa xarici investisiyaların 4%-i Yaponiyadan yatırılan sərmayələrin payına düşüb.

Öz növbəsində, Azərbaycan ötən il Yaponiya iqtisadiyyatına 18,454 milyon ABŞ dolları sərmayə qoyub ki, bu da 2023-cü illə müqayisədə 16,593 milyon ABŞ dolları və ya 9,9 dəfə çoxdur. Birbaşa xarici investisiyaların ümumi həcmində Yaponiyaya yatırılan Azərbaycan sərmayələrinin xüsusi çəkisi 1,3% təşkil edib.

Məlumat üçün qeyd edək ki, 2023-cü ildə Yaponiyadan Azərbaycana yönəldilən birbaşa xarici investisiyaların həcmi 193,852 milyon ABŞ dolları, Azərbaycandan Yaponiyaya yatırılan investisiyaların həcmi isə cəmi 1,861 milyon ABŞ dolları olub.

Ümumilikdə, 2024-cü ildə Azərbaycan iqtisadiyyatına birbaşa xarici investisiyalar 7,046 milyard ABŞ dolları təşkil edib ki, bu da 2023-cü illə müqayisədə 388,1 milyon ABŞ dolları və ya 5,83% artım deməkdir.

Bununla yanaşı, hesabat ili ərzində Azərbaycandan xarici iqtisadiyyata yönəldilmiş birbaşa xarici investisiyalar 1,762 milyard ABŞ dolları olub ki, bu da 2023-cü illə müqayisədə 1,354 milyard ABŞ dolları və ya 43,3% azalma deməkdir.

Fuad Mədətov
Finss.az