Cari həftənin çərşənbə axşamı Avrozonada və Almaniyada bir sıra əhəmiyyətli iqtisadi göstəricilər açıqlanacaq. İstehlak Qiymətləri İndeksi (İQİ), sənaye və xidmət sektorlarında Biznes Aktivliyi İndeksi (BAİ) göstəriciləri investorların diqqət mərkəzində olacaq. Bu məlumatlar, Avropa iqtisadiyyatının ümumi vəziyyəti barədə daha dəqiq bir təsəvvür yarada bilər və bazar iştirakçıları üçün strateji qərarların verilməsində əhəmiyyətli rol oynaya bilər.

Finss.az xəbər verir ki, cümə axşamı isə Avropa Mərkəzi Bankının (AMB) son toplantısının protokolları dərc olunacaq. Bu protokollar, AMB-nin gələcəkdəki pul siyasətinə dair göstərişlər və bankın qərar qəbuletmə prosesinə dair dərinləşdirilmiş məlumat təqdim edəcək.

Ötən həftə EURUSD məzənnəsi 1.0910 səviyyəsindən başlayaraq 1.1050 həddinə qədər artdı və həftəlik şamını 1.1030 səviyyəsində bağladı. Məzənnənin 1.10$ həddinin üzərində qalması, "buğalar" üçün artım tendensiyasının davam edə biləcəyini göstərir. Əgər qiymət bu səviyyəni qoruyub saxlaya bilsə, müsbət tendensiya artaraq davam edə bilər.

İnvestorlar və bazar iştirakçıları üçün bu məlumatlar, yaxın gələcəkdəki valyuta bazarlarının istiqamətini təyin etməkdə mühüm əhəmiyyət kəsb edir.