JPMorgan ABŞ məhkəməsindən VTBank-a qarşı iddiasını rədd etməyi xahiş edib

Amerikan bankı JPMorgan Chase, Rusiyanın VTBank-ına qarşı xüsusi əməliyyatın başlanmasından sonra dondurulan 439,5 milyon dollarla bağlı qaldırdığı iddianın ABŞ məhkəməsi tərəfindən rədd edilməsini xahiş edib. Bank, bu addımı "öz iradəsinə zidd" olaraq atdığını bildirib, deyə Reuters xəbər verir.

Aprelin 18-də Reuters məlumat vermişdi ki, JPMorgan Chase, VTBank-ı məhkəməyə verərək, dondurulmuş 439,5 milyon dolların geri qaytarılması cəhdlərini dayandırmağı tələb edib. JPMorgan, VTBank-ın aprelin 17-də Rusiyada ona qarşı vəsaitlərin geri qaytarılması ilə bağlı iddia qaldırdığını, bunun isə iki bank arasında mübahisələrin Nyu-Yorkda həll edilməsi ilə bağlı razılaşmanı "kobud şəkildə pozduğunu" iddia edib. Bir həftə sonra Sankt-Peterburq və Leninqrad vilayətinin Arbitraj Məhkəməsi VTBank-ın iddiası əsasında JPMorgan Chase-in Rusiyadakı aktivlərinə 439,5 milyon dollar həcmində həbs qoyulmasına qərar verib.

Reuters-in məlumatına görə, VTBank, mübahisələrin ABŞ-da həll edilməsinə razılıq versə də, iyun ayında Sankt-Peterburq və Leninqrad vilayətinin Arbitraj Məhkəməsi Amerikan bankına qarşı Rusiyada xaricdə VTBank-la bağlı hər hansı məhkəmə işlərinin başlanmasını və ya davam etdirilməsini qadağan edib.

JPMorgan isə iddianı geri çəkmək məcburiyyətində qalmasını, qadağanı pozduğu təqdirdə Rusiyada qarşılaşa biləcəyi qeyri-müəyyən risklərlə izah edib.