İpoteka və Kredit Zəmanət Fondunun (İKZF) müvəkkil banklara güzəştli kreditləşmə üçün ayırdığı yeni limitlər bu gündən aktivləşdirilib.
Fins.az xəbər verir ki, limitlər saat 11:00-dan aktivdir.
İpoteka kreditinin alınması üçün müraciətlərin qəbulu Elektron Hökumət Portalında mövcud olan “Elektron ipoteka və kredit zəmanət” sistemi vasitəsi ilə real vaxt rejimində həyata keçirilir.
Xatırladaq ki, adi ipoteka kreditləri üzrə müraciətlərin qəbuluna fevralın 2-dən başlanılıb və hazırda proses davam etdirilir.
Bu ilin dövlət büdcəsində ipoteka kreditlərinin maliyyələşdirilməsi üçün 87,7 milyon manat nəzərdə tutulub.
2023-cü ildə İKZF-nin vəsaiti hesabına ötən il ərzində müvəkkil banklar tərəfindən 459,4 milyon manat həcmində 5 563 ipoteka krediti (348,5 milyon manat məbləğində 3 884 adi ipoteka krediti və 111 milyon manat məbləğində 1 679 güzəştli ipoteka krediti) verilib ki, bu da Fondun fəaliyyətə başladığı 2006-cı ildən etibarən ən yüksək göstəricidir.
2022-ci ilə nisbətən verilmiş ipoteka kreditlərinin həcmində 9 % artım (2022-ci ildə 421,5 milyon manat məbləğində 5 522 ipoteka krediti verilib) qeydə alınıb.
Fuad Mədətov
Fins.az