Azərbaycanda fəaliyyətdə olan bankların cəmi aktivləri 45,218.3 mln. manat təşkil edib.

Fins.az Azərbaycan Mərkəzi Bankına istinadən xəbər verir ki, bu, ötən il eyni dövrü ilə müqayisədə 7,9% çoxdur.

Bu dövrdə bank sektorunun cəmi öhdəlikləri 39,305.6 mln. manat, balans kapitalı 5,912.7 mln. manat olub. İyun ayında bankların kredit portfeli 3.1% və ya 637 mln. manat artaraq 21,296.2 mln. manata bərabər olub. Kredit portfelində biznes kreditləri – 54.7% (11,650.5 mln. manat) istehlak kreditləri – 29.7% (6,324.7 mln. manat) ipoteka kreditləri – 15.6% (3,321 mln. manat) təşkil edib.

Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı əvvəlki ilin müvafiq dövrünə nəzərən 1.2 faiz bəndi azalaraq 2.3% təşkil edib. Öhdəliklərin strukturunda depozit portfeli üstünlük təşkil edir – cəmi öhdəliklərin 82%-i və ya 32,056.7 mln. manat.

Depozit portfelinin 61.1%-i (19,584.2 mln. manat) hüquqi şəxslərin, 38.9%-i (12,472.5 mln. manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir. Hesabat ayında bankların əmanət portfeli 2.7% və ya 329.5 mln. manat artıb. Əmanət portfelinin 52.9%-i (6,595.5 mln. manat) müddətli əmanətlərdən ibarətdir. Hüquqi şəxslərin tələbli depozitləri 16,105.9 mln. manat olmaqla, hüquqi şəxslərin cəmi depozit portfelinin 82.2%-ni təşkil edib. Fiziki şəxslərin əmanətlərinin dollarlaşması iyun ayında ilin əvvəlinə nəzərən 2.6 faiz bəndi, əvvəlki ilin müvafiq dövrünə nəzərən isə 3.6 faiz bəndi azalaraq 36.6% təşkil edib.