“Cari ilin 9 ayında Fondun daşınmaz əmlak alt portfeli üzrə 9,86% gəlirliliyi olmuş, gəlirlilikdə “Fond investisiyaları” və “Müştərək investisiyalar” əsas payı təşkil etmişdir. Fondun daşınmaz əmlak alt portfelinin strukturuna daxil olan “Birbaşa investisiyalar” üzrə məzənnə dəyişikliyi nəzərə alınmaqla bir əmlakı üzrə gəlirlilik müşahidə edilsə də digər əmlaklar üzrə mənfi gəlirlilik olmuşdur. Əvvəlki rəylərdə olduğu kimi “Birbaşa investisiya” aləti üzrə daşınmaz əmlak bazarının tələblərinə uyğun mövcud iqtisadi vəziyyət nəzərə alınmaqla yeni tənzimləmə mexanizmlərinin tətbiqinə zərurət olduğu qənaətindəyik”,- Rəydə deyilir.

Rəydə qeyd edilib ki, Neft Fondunun daşınmaz əmlak komplekslərinə investisiyaların ümumi dəyəri 2 milyard 905,6 milyon ABŞ dolları təşkil etmişdir. Fond London şəhərinin West End səmtində, Seynt Ceyms 78 ünvanında yerləşən dəyəri 174,5 milyon funt sterlinq təşkil edən ofis kompleksinə, Moskva şəhərinin biznes mərkəzi “Tverskaya 16” ünvanında yerləşən və dəyəri 3 milyard 159,5 milyon Rusiya rublu təşkil edən “Qalereya Aktyor” ofis-ticarət mərkəzinə, Paris şəhərinin Vendom meydanı 8 ünvanında yerləşən, dəyəri 206 milyon avro təşkil edən daşınmaz əmlak kompleksinə və Tokio şəhərində yerləşən və dəyəri 55,664 milyard yapon yeni təşkil edən ticarət mərkəzinə investisiya etmişdir. Bundan əlavə daşınmaz əmlak portfelinə “PGIM”, “AXA Investment Management”, “PAG”, “E-Shang Redwood”, “Gaw Capital”, “Blackstone”, “BlackRock”, “Walton Street”, “Ares”, “BentallGreenOak”, “Starwood”, “Angelo, Gordon Co”, “FLE SICAV-FIS”, “Prologis”, “Charter Hall” və “Brookfield” tərəfindən idarə olunan fond investisiyaları; “PGIM”, “Gaw Capital”, “Blackstone”, “Walton Street”, “KIC” və “AroundTown” ilə birlikdə müştərək investisiyalar daxil olmuşdur.