"AccessBank”ın simaları" rubrikasında bugünkü həmsöhbətimiz Nərimanov filialının rəhbəri Bəxtiyar Bəxtiyarovdur.

Neçə ildir “AccessBank”da işləyirsiniz? İlk iş gününüzü necə xatırlayırsınız?

Artıq 13 ildir “AccessBank”da işləyirəm. İndiki kimi xatırlayıram - hərbi xidmətdən yeni qayıtmışdım. İlk 2 gün ərzində CV-mi müxtəlif banklara göndərdim. O vaxtlar CV-ni şəxsən özün ofisə aparmalıydın, hələ əlavə olaraq, anket də doldurmalıydın.

Tezliklə müxtəlif banklardan test və müsahibə dəvətləri gəlməyə başladı. Nəticədə bir neçə bankdan iş təklifi aldım, amma operativliyi, həmçinin müştəri və əməkdaşlarına göstərdiyi diqqətə görə “AccessBank”ı seçdim.

10 il əvvəlki və indiki “AccessBank”ın əsas fərqi nədədir?

10 il əvvəl “AccessBank” yalnız mikrokreditləşmə bankı kimi tanınırdısa, indi daha geniş bank xidmətlərini təqdim edirik. Bu gün innovasiyalar tətbiq edərək rəqəmsal bankçılığa doğru irəliləyirik.

Heç bank sektorunu seçdiyiniz üçün nə vaxtsa peşman olmusunuzmu?

Heç vaxt. Düşünürəm ixtisas seçimi çox mürəkkəb və çətin bir prosesdir. Bank işi çox maraqlı  və dinamik iş olduğuna görə daxili dünyamla tam olaraq harmoniyadadır. İnsanlar sevdiyi peşə ilə məşğul olanda daha məhsuldar və yaradıcı olurlar. 

“AccessBank”ın Salyan filialına rəhbərlik etdikdən sonra Nərimanov filialının inkişafını üzərinizə götürmüsünüz. Bölgə və şəhər filialına rəhbərlik etməyin ortaq və fərqli cəhətləri hansılardır?

Məncə hər iki filialın oxşar cəhəti bank xidmətləri təqdim etməsidir. Fərqlərə gəldikdə məncə, bölgə filiallarında daha çox kənd təsərrüfatı təyinatlı kreditlərə üstünlük verilir və ölkənin bir çox bölgələrində bankımız kənd təsərrüfatı kreditləşməsi üzrə liderdir. Şəhər filialında isə daha çox pərakəndə bank xidmətləri təqdim edirik.

Həm regional, həm də şəhər filiallarını idarə edən şəxs kimi qeyd etmək istəyirəm ki, bankın ən vacib kapitalı - müştəriləri tanıyan və istəklərini bilən əla mütəxəssislər qrupudur. Belə komanda ilə bank böyük uğurlar qazanır.

Şəxsi inkişafınıza önəm verirsiniz – müxtəlif təlimlərə qatılırsınız. Sizcə, işdə insana hansı daha çox kömək edir – illərin təcrübəsi yoxsa yenilənən biliklər?

Mənim üçün bilik və təcrübə bir-biri ilə əlaqədə olan elementlərdir. Durmadan təhsil almaq, üzərində işləmək həyatımın ən xoş anlarından biridir. Yeni məlumatlar, yanaşmalar, baxışlar insanları daha fərqli, daha optimal və innovativ işləməyə ilhamlandırır. Elmi ədəbiyyatda "beyin sevinci" termini var və bu “sevinc” yeni biliklər əldə ediləndə yaşanır. Təcrübə isə nəzəri biliklərin  sınaqdan keçirilməsidir.

Harvard, Massaçusets Texnologiya İnstitutunda və London Universitetində aldığım kurslar şəxsi inkişafımda və professional həyatımda dönüş nöqtəsi oldu və nəticədə işimdə daha ciddi nəticələrə əldə etməklə yanaşı, qazandığım bilik və təcrübələri həmkarlarımla da bölüşə bildim.

Keçdiyiniz sonuncu təlimdə hansı fikir sizə daha çox maraqlı gəldi?

Bu yaxınlarda təlim zamanı "adaptiv liderlik" anlayışı ilə tanış oldum. Anlayışın müəllifi Ronald Heifetz hesab edir ki, liderlik adaptiv problemlərin ortaya çıxdığı zaman yaranan idarəçilik mexanizmdır. Heifetza görə liderlik  proses kimi qəbul edilməlidir - məsələn, Covid-19 pandemiyası zamanı yeni vəziyyətə uyğunlaşma və problemləri həll etmə qabiliyyəti liderliyə nümunədir. Liderliyə ehtiyacın yalnız çətinliklərlə üzləşdikdə yaranması fikri marağımı çəkdi.

Covid-19 pandemiyası dövründə “AccessBank”ın fəaliyyətini və bankın əməkdaşlarının standart olmayan vəziyyətlərə hazırlığını necə qiymətləndirirsiniz?

Biz işdə strateji riskləri dəyərləndirmək üçün stress testlərdən istifadə edirik, amma təbii ki, pandemiya bizim üçün gözlənilməz oldu. Buna baxmayaraq, Bankın kadr siyasəti, böhran dövründə idarəetmə təcrübəsi və rəqəmsal bankçılığın prioritet olaraq seçilməsi- bütün bunlar pandemiyaya qarşı mübarizədə komandaya böyük dəstək oldu. Bundan başqa, “AccessBank” komandasında qurulmuş kommunikasiya modeli və işin təşkili çox sabitdir, nəticədə pandemiya zamanı onlayn iş rejimi və pandemiya ilə əlaqədar məhdudiyyətlər Bankın fəaliyyətinin səmərəliliyinə və göstərdiyi xidmətlərin keyfiyyətinə təsir göstərmədi.

Qeyd etmək istərdim ki, Bankımız həmin çətin günlərdə müştərilərinə maliyyə həlləri təqdim etdi. İşgüzar fəallığın azalması ilə üzləşən sahibkarlara həm öz, həm də dövlət fondlarının hesabına aşağı faiz dərəcələri ilə yenidənqurma kreditləri və ya cari kreditlərinin restrukturizasiyasını təklif etdi.