ABŞ-ın üçüncü ən böyük bankı, 2020-ci ilin sonuna aktivlərinin həcmi 2,26 trilyon dollar təşkil edən Citigroup ötən gün cari ilin birinci rübünün nəticələrini açıqlayıb.

Fins.az xəbər verir ki, ümumi gəlirlər ötən ilin müvafiq dövrü ilə müqayisədə 7% azalaraq 20,7 milyard dollarda qərarlaşsa da, digər göstəricilərdə bank proqnozları yetərincə üstələyib.

Belə ki, səhmlərin ticarətindən gəlirlər digər banklardan fərqli olaraq kifayət qədər artmış, proqnozlaşdırılan həddən 300 milyon dollar daha artıq - faktiki 1,48 milyard dollar təşkil etmişdir. İnvestisiya bankçılığı fəaliyyətingən gəlir 46% artaraq, 1,97 milyard dollara çatmışdır (Refinitiv və digər analitiklərin proqnozu 1,67 milyard dollar idi). Bank hesabat rübündə 3,9 milyard dollar həcmində kredit ehtiyatlarını dövriyyəyə buraxmış, nəticədə 1,75 milyard dollar kredit itkiləri qarşılığında 2,06 milyard dollar qazanc əldə etmişdir. Nəhayət, ən vacib göstəricilərdən biri olan xalis mənfəət 7,94 milyard dollar, yaxud bir səhmə görə 3,62 dollar təşkil etmişdir (Refinitiv bir səhmə düşən mənfəəti 2,60 dollar proqnozlaşdırırdı).

Bank həmçinin ABŞ xaricindəki 13 ölkədə fəaliyyətlərinin bir hissəsini məhdudlaşdıracağını bildirib. Bu ilin fevralında korporasiyanın baş icraçı direktoru təyin edilmiş, Citidə 17 illik təcrübəyə malik Ceyn Freyzer Avstraliya, Bəhreyn, Çin, Hindistan, İndoneziya, Koreya, Malayziya, Filippin, Polşa, Rusiya, Tayvan, Tayland və Vyetnamdakı pərakəndə bankçılıq bazarından çıxacaqlarını və əvəzinə əsas diqqəti daha böyük sərvətin və maliyyə vəsaitlərinin məkanı olan Sinqapur, Honkonq, Birləşmiş Ərəb Əmirlikləri və Londona cəmləşdirəcəklərini bəyan edib: “Davam etməkdə olan strateji yenilənmələrimizin nəticəsi olaraq, qərara gəldik ki, gəlirlərimizi ikiqat artıraq. Yerdə qalan bazarlara fokuslanmaq bu vacib habların vasitəsilə aktivlərin idarə olunması biznesinin vəd etdiyi sürətli artım və daha yüksək gəlir imkanlarından yararlanmaqda mövqeyimizi möhkəmləndirəcəkdir”.

Citigroup sözügedən 13 ölkədə investisiya bankçılığı fəaliyyətlərini davam etdirəcəyini qeyd edib. Bankın çıxacağı bazarlardakı pərakəndə əməliyyatların həcmi ötən ilki ümumi 74,3 milyard gəlirin 4,2 milyard dollarlıq hissəsini təşkil edirdi.

Xatırladaq ki, bir gün öncə digər iri ABŞ bankları da 2021-ci ilin birinci rübünün nəticələrini açıqlayıblar. JPMorgan Chase 14,3 milyard dollar, Goldman Sachs 6,84 milyard dollar, Wells Fargo isə 4,7 milyard dollar mənfəət əldə edib.