II Beynəlxalq “Kibertəhlükəsizlik həftəsi” çərçivəsində 3 mart tarixində dövlət və bank sektorunda çalışan kibertəhlükəsizlik üzrə mütəxəssislər üçün “Pentestinq” üzrə praktiki seminar keçirilib.

 Fins.az xəbər verir ki, bu barədə Nazirlik məlumat yayımlayıb 

Məlumatda bildilir ki, Nəqliyyat, Rabitə və Yüksək Texnologiyalar Nazirliyinin İnformasiya-Kommunikasiya Texnologiyalarının Tətbiqi və Tədrisi Mərkəzi (İKT LAB) və “IS3S” şirkətinin birgə təşkilatçılığı ilə baş tutan seminarda “Infomation Security Solutions” şirkətinin həmtəsisçisi Azamat Zilokov çıxış edərək informasiya təhlükəsizliyinin təmini məsələlərinin önəmliyini qeyd edib. O bildirib ki, bu sahədə mövcud problemlərin aradan qaldırılması birgə səylərin birləşdirilməsini tələb edir.

 “Information Security Solutions” şirkətinin nümayəndəsi, Rusiyada tanınmış kibertəhlükəsizlik mütəxəssisi və tədqiqatçısı Yuri Qurkin pentest, yəni informasiya təhlükəsizliyi üzrə sınaqlar və hücumların tipləri, metodologiyası, təhdidlərin növləri, istifadə olunan ənənəvi kibertəhlükəsizlik həllərinin üstün və mənfi cəhətlərini diqqətə çatdırıb, təhdidlərin qarşısını almaq, eləcə də bank sistemi üçün arxitektura həlləri üzrə tövsiyələrlə çıxış edib.

Məruzəçi eyni zamanda pentest üzrə sənədin hazırlanma qaydası, sertifikatlaşdırılmış həllərin istifadəsinin üstün və mənfi cəhətləri, veb-təhdidlər, manual, avtomatik test və digər əhəmiyyətli mövzular haqqında seminar iştirakçılarına geniş məlumat verib.

Sonra məruzəçi iştirakçıların çoxsaylı suallarını cavablandırıb.

Xatırladaq ki, “Kibertəhlükəsizlik həftəsi” sahə üzrə əlaqəli fəaliyyətin səmərəliliyinin artırılması və maarifləndirmə səviyyəsinin yüksəldilməsi məqsədilə Nəqliyyat, Rabitə  və Yüksək Texnologiyalar Nazirliyi tərəfindən ikinci ildir ki keçirilir.