Finss.az xəbər verir ki, Mercedes-Benz şirkətinin mətbuat açıqlamasına əsasən, 2025-ci ildə minik avtomobillərinin qlobal satışları ötən illə müqayisədə 9,2% azalaraq 1,8 milyon ədədə düşüb. Bu azalma avtomobil sənayesində müşahidə olunan ümumi bazar zəifləməsi ilə əlaqələndirilir.

Avropa bazarında (Avropa Birliyi, Birləşmiş Krallıq, İsveçrə və Norveç daxil olmaqla) Mercedes-Benz satışları 1% azalaraq 634.600 ədəd təşkil edib. Şirkətin əsas bazarlarından biri olan Almaniyada isə satışlar demək olar ki, dəyişməyərək 213.200 ədəd səviyyəsində qalıb.

Mütəxəssislər premium avtomobil seqmentində artan rəqabət, istehlakçı tələbatındakı dəyişikliklər və iqtisadi qeyri-müəyyənliklərin satışlara təsir etdiyini bildirirlər. Mercedes-Benz rəhbərliyi isə qarşıdakı dövrdə yeni modellər və elektrik avtomobillərinə yönəlik strategiya ilə bazar mövqeyini gücləndirməyi hədəfləyir.