İtaliyanın məşhur avtomobil istehsalçısı Ferrari, Ferrari 499P prototipinin “Le Manın 24 Saatı” yarışında ardıcıl üçüncü qələbəsini qeyd etmək məqsədilə Ferrari F76 adlı yeni konsept modelini təqdim edib.

Finss.az xəbər verir ki, modelin adı Scuderia Ferrari komandasının 1949-cu ildə Le Manda qazandığı ilk qələbəyə istinad edir və markanın keçmişi, bu günü və gələcəyini birləşdirən dizayn manifesti kimi dəyərləndirilir.

Ferrari F76 konsepti dizayn direktoru Flavio Manzoninin rəhbərliyi altında hazırlanıb və gələcək Ferrari superkarlarının dizayn baxışını nümayiş etdirir. Konsept avtomobil seriya istehsalı üçün nəzərdə tutulmayıb və qeyri-adi iki ayrı kokpitdən ibarət “füzelyaj” quruluşu ilə seçilir. Bu yanaşma aerodinamik səmərəliliyi artırmaq üçün arxa hissədə mərkəzi hava kanalının formalaşdırılmasına imkan yaradır.

Modeldə əlavə yerəsıxma qüvvəsi iri ön və arxa spoylerlər, eləcə də diffuzor vasitəsilə təmin olunur. Aerodinamik elementlərin optimallaşdırılmasında generativ süni intellekt texnologiyalarından istifadə edilib. Dizayn baxımından Ferrari F80 hiperkarını xatırladan bucaqlı ön hissə, nəhəng splitter, xarakterik yan qanadlar və dörd nazik LED arxa fənər konseptin əsas vizual elementləri sırasındadır.

Kokpitlərə giriş yuxarı qalxan yarış tipli şəffaf kapotlar vasitəsilə həyata keçirilir. Hər iki kokpit eyni quruluşa malikdir və drive-by-wire texnologiyası əsasında işləyən sükan-pedal sistemi ilə tam sinxronlaşdırılıb. Ferrari F76 yalnız rəqəmsal formatda, NFT kimi təqdim olunur və Ferrari Hyperclub üzvləri üçün nəzərdə tutulub. Layihə Ferrari-nin Dünya Dözümlülük Çempionatı və Le Man yarışlarındakı mövqeyini gücləndirməyi hədəfləyir.