Toyota avtomobil istehsalçısı yeni Land Cruiser FJ ofrouderini təqdim edib. Model əvvəlki J250 versiyasından 35 santimetr qısadır və Hilux Champ pikapı ilə eyni platformanı paylaşır.

Finss.az xəbər verir ki, yeni Land Cruiser FJ-nin ölçüləri belədir: uzunluq 4575 mm, en 1960 mm, hündürlük 1855 mm, təkər bazası isə 2580 mm təşkil edir. Ofrouder 2,7-litrlik mühərriklə təchiz olunub; mühərrik 161 at qüvvəsi və 245 Nm fırlanma anı təmin edir. Avtomobil altıpilləli transmissiya və qoşulan tam ötürmə sistemi ilə gəlir.

Layihənin baş mühəndisi Masaya Uniyama bildirib ki, FJ modeli Avropa və ABŞ bazarlarında satışa çıxarılmayacaq.

Yeni Land Cruiser FJ molle panelləri, çıxarıla bilən ön və arxa bamperlər, şnorkel və digər fərdiləşdirmə imkanları ilə təchiz edilib. Avtomobilin xarici görünüşü yumru faralar, iri kuzov dəsti və arxada bərkidilmiş ehtiyat təkəri ilə tamamlanır. İnteryer klassik Toyota üslubunda dizayn edilib və iri ön paneldə üfüqi ekran və transmissiya dəstəyi yerləşir.

Yaponiyada satış 2026-cı ilin ortalarında başlayacaq, kütləvi debüt isə Japan Mobility Show sərgisində bu ayın sonunda həyata keçiriləcək.