Finss.az - Lexus brendinin flaqmanı LS modeli 36 il sonra vida mərhələsinə qədəm qoyur. LS Heritage Edition xüsusi versiyası birinci nəsil LS sedanına həsr olunub və yalnız 250 ədəd istehsal olunaraq ABŞ bazarında satışa çıxarılacaq.

Yeni versiyanın eksteryeri tünd qara metallik (Ninety Noir) rəngindədir, 20 düymlük tünd boz təkər diskləri ilə təchiz olunub. İnteryer qırmızı Rioja Red dərisi, ağac şpon dekoru və Ultrasuede tavan/günəşliklər ilə üzlənib. Mərkəzi konsolda həkk olunmuş loqotip və avtomobilin başlıqlarına tikilmiş siluet xüsusiyyəti diqqət çəkir.

Standart avadanlığa panoram dam, dairəvi görüntü sistemi, qızdırılan arxa oturacaqlar və 23 dinamikli 2 400 vatt Mark Levinson audio sistemi daxildir. Texniki cəhətdən LS 500 AWD 3,4-litrlik V6 tvin-turbo mühərriki (422 at qüvvəsi, 600 Nm), 10-pilləli avtomatik transmissiya və Torsen differensialı ilə təchiz olunub.

Qeyd edilir ki, 2026 model ilində flaqmanın başqa versiyaları olmayacaq. LS Heritage Edition-un qiyməti 99 280 ABŞ dolları təşkil edir.

Maraqlıdır ki, ABŞ bazarında bu ilin birinci yarısında yalnız 691 LS sedanı satılıb ki, bu da ötən ilin eyni dövrü ilə müqayisədə 42% azalma deməkdir. Yeni Lexus ES sedanı artıq markanın flaqmanı adına iddia edir.