Finss.az – Dünyanın aparıcı avtomobil istehsalçılarından biri olan Ford, məşhur Focus ST modelinin istehsalına son verdiyini açıqlayıb.

Böyük Britaniyada artıq bu hot-hatch modelinə sifarişlər qəbul edilmir. Beləliklə, uzun illərdir sürət və praktikliyin vəhdəti kimi tanınan Focus ST ilə avtomobil dünyası vidalaşmağa hazırlaşır.

Avropada geri sayım başladı

Ford-un Böyük Britaniya nümayəndəliyindən verilən məlumata görə, yeni sifarişlər artıq qəbul edilmir, lakin ölkə üzrə dilerlərin anbarında hələ də təxminən 170 ədəd satılmamış Focus ST mövcuddur. Alıcılar yalnız bu stok modellərdən seçim edə biləcəklər.

Digər Avropa ölkələrində model hələ də konfiqurasiya edilə bilir. Məsələn, Almaniyada Ford Focus ST satışdadır və 43 200 avrodan başlayan qiymətlərlə təklif olunur. Buna baxmayaraq, Focus ailəsinin tam istehsaldan çıxacağı tarix – 30 noyabr 2025 – artıq rəsmi olaraq təsdiqlənib.

Focus ST: Bir dövrün sonu

Ford Focus-un “yüksəkgüclü” ST versiyası, brendin RS xətti ilə birlikdə illərlə hot-hatch seqmentinə rəhbərlik edib. Lakin ekoloji tələblər və elektrikləşmə meylləri nəticəsində bu modellər yavaş-yavaş bazardan çəkilməyə başlayıb. İlk qurban RS oldu, indi isə növbə ST-yə çatıb.

Almaniyada Focus ST hələ də 280 at gücündə 2.3 litrlik turbo mühərrik və 6-pilləli mexaniki və ya 7-pilləli robotlaşdırılmış transmissiya ilə təqdim olunur. Ən bahalı X Edition versiyası yalnız mexaniki ötürücü ilə təklif edilir. Britaniyada isə yalnız 1,0 litrlik, 3 silindrli sadə versiyalar qalıb.

Puma ST – tək “yüklü” benzinli model olaraq qalır

Focus ST-nin istehsaldan çıxarılması ilə Ford-un “performans” benzinli modelləri sırasına yalnız Puma ST daxil olacaq. Lakin bu modeldə artıq 200 at gücündə 1.5-litr mühərrik və mexaniki sürət qutusu mövcud deyil. Yalnız 160 at güclü 1.0-litr hibrid mühərrik və 7-pilləli robotlaşdırılmış transmissiya ilə təklif edilir.