Finss.az - Alman avtomobil istehsalçısı Audi, yeni modellərində materialların keyfiyyətinin aşağı düşdüyünü etiraf edib və bu problemi aradan qaldırmaq üçün tədbirlər görəcəyini açıqlayıb.

Son illərdə Audi avtomobillərində sərt plastik və boyalı plastik elementlərin istifadəsinin artması müştərilər tərəfindən narazılıqla qarşılanıb. Xüsusilə A6 e-tron, Q5 və A5 Avant modellərində bu dəyişikliklər açıq şəkildə görünür. Premium sinif avtomobillərində yüksək keyfiyyətli materiallara öyrəşmiş istifadəçilər üçün bu, məyusedici amil olub.

Audi-nin nümayəndəsi Oskar da Silva Martins yenilənmiş Audi Q5-in təqdimatında məsələni etiraf edərək, markanın əvvəlki keyfiyyət standartlarını bərpa edəcəyini bildirib. Gözlənilir ki, yaxın gələcəkdə restaylinq ediləcək modellərdə material keyfiyyəti yüksəldiləcək.

Bazarın artan tələblərinə və ekoloji standartların sərtləşməsinə uyğunlaşmağa çalışan Audi, lüks avtomobil seqmentində mövqeyini gücləndirməyi planlaşdırır. Şirkət həmçinin qiymətlərin artacağını vəd edərək, premium seqmentdə daha iddialı addımlar atmağa hazırlaşır.