2022-ci ilin ilk 4 ayında (yanvar-aprel) Azərbaycana 293 milyon 917 min dollar dəyərində 23 min 356 ədəd nəqliyyat vasitəsi (avtomobi) idxal edilib.

"Fins.az"xəbər verir ki, Dövlət Gömrük Komitəsi bu barədə məlumat yayımlayıb. 

Məlumata görə, cari ilin yanvar-aprel dövründə idxal edilən avtomobillərin sayı ötən ilin eyni dövrü ilə müqayisədə 498 ədəd və ya 2,1% azalıb. 2021-ci ilin ilk 4 ayında Azərbaycana 244 milyon 577 min dollar dəyərində 23 min 854  ədəd avtomobil idxal edilmişdi.

Bu ilin yanvar ayında 5 min 685 ədəd, fevral ayında 5 min 460 ədəd, mart ayında 5 min 957 ədəd, aprel ayında isə 6 min 254 ədəd avtomobil idxal edilib.

Minik avtomobillərinin idxalı 2020-ci ilin ilk 4 ayındakı 21 min 948 ədəddən 2022-ci ilin ilk 4 ayında 21 min 574 ədədə geriləyib.

2022-ci ilin ilk 4 ayında Azərbaycana 4 min156 ədəd daxili yanma mühərriklə yanaşı elektrik mühərriklə də hərəkətə gətirilən nəqliyyat vasitələri və 92 ədəd yalnız elektrik mühərriklə hərəkətə gətirilən nəqliyyat vasitələri idxal edilib.

Yük avtomobillərinin idxalı ötən ilin ilk 4 ayında 1820 ədəd ikən, cari ilin eyni dövründə 1443 ədəd təşkil edib.