Azərbaycanda heç də bütün banklar maliyyə göstəricilərini ictimaiyyətlə açıqlamağa maraq göstərmir. Xüsusilə bu ilin fevral ayındakı devalvasiyadan sonra kredit təşkilatları maliyyə hesabatlarını açıqlamaqdan çəkinirlər. Halbuki qanunvericiliyə görə, hər bir bank rübdə bir dəfə maliyyə vəziyyətinin necə olması barədə hesabat yaymalıdır.

Nəzərə alsaq ki, hazırda 3-cü rübün son ayıdır, deməli 2-ci rübün maliyyə hesabatları ən azı 1 ay bundan əvvəl bankların internet səhifələrində yerləşdirilməli idi. Reallıq isə odur ki, bəzi banklar nəinki builki, heç 2014-cü ildəki fəaliyyətlərinin yekunlarına dair hesabatı yaymayıblar.

Məsələn, Pakistan Milli Bankının Bakı filialınının sonuncu hesabatı 2010-cu ildə, “Naxçıvankbank”ın maliyyə hesabatı 2011-ci ildə, hazırda maliyyə problemləri yaşayan “Bank of Azerbaijan”ın, eləcə də “Bank Stantard”ın maliyyə hesabatı 2013-cü ildə açıqlanıb.

“Amrahbank”, "Bank Respublika", “Günaybank”, “Xalq Bank”, “Muğanbank”, “Bank Nikoil”, “Parabank”, “Bank Technique”, “Yapı Kredi Bank (Azərbaycan)” və “Zaminbank” isə 2014-cü ilin yekununa dair maliyyə hesabatını açıqlamaqla kifayətləniblər. Bankların 2015-ci ildəki fəaliyyəti isə ictimaiyyətə qaranlıq qalıb.

2 bankın – “Azərbaycan Beynəlxalq Bankı” və “Bank Avrasiya” saytları ümumiyyətlə açılmır. Buna görə də, onların maliyyə hesabatlarına dair vəziyyətlə tanış olmaq mümkün deyil.

Sonuncu dəfə "AGBank" bu ilin yanvar ayında, “Atabank” və "Dəmirbank" bu ilin 1-ci rübündə, “Bank BTB” və “Dekabank” ötən ilin 3-cü rübündə, “Kredobank”, "Gəncəbank" və “Yunayted Kredit Bank” isə ötən ilin 2-ci rübündə hesabat veriblər.

Yalnız 16 bankda – “Accessbank”, “AFB Bank”, “Azərbaycan Sənaye Bankı”, “Azər-Türk Bank”, “Bank of Baku”, “Bank Silk Vey”, “Bank VTB (Azərbaycan), “Caspian Development Bank”, “Kapitalbank”, “Qafqaz İnkişaf Bankı”, İran Milli Bankının Bakı filialı, “NBC Bank”, “PAŞA Bank”, “Rabitəbank”, "Unibank" və "Yunayted Kredit Bank"da maliyyə hesabatları 2015-ci ilin 2-ci rübünə qədər olan dövrü əhatə edir.