Xəbər verildiyi kimi, Azərbaycan “Yaşıl Kart” sisteminə qoşulur. Bununla bağlı “İcbari sığortalar haqqında” qanuna dəyişikliklər edilib. Qarşıdakı
bir ay ərzində BMT-nin Avropa İqtisadi Komissiyasına və “Yaşıl Kart” sisteminin idarəedici təşkilatı olan Bürolar Şurasına rəsmi müraciət edəcək. Nəticədə xarici ölkələrdə qəza törədən Azərbaycanın avtomobil sahiblərinin də mülki məsuliyyəti sığortalanacaq. Sistemin fəaliyyəti üçün Azərbaycanda “Yaşıl kart” bürosu təsis ediləcək. Büronun funksiyalarını İcbari Sığorta Bürosu (İSB) həyata keçiriləcək.

Yaşıl Kart nədir?

“Yaşıl kart”- üzv ölkələr arasında avtonəqliyyat vasitələri sahiblərinin məsuliyyət sığortası üzrə beynəlxalq sığorta sazişidir.

1949-ci ildə Londonda avtosığortaçıların beynəlxalq konfransında BMT-nin İqtisadi və sosial şurasının tövsiyələri qəbul edilib və qərargahı Londonda olan Bürolar Şurası rəsmən təsis edilib.

1951-ci ildə Bürolar Şurasının ilk rəsmi iclası keçirilib və sistemin qəbul edildiyi ölkələrin milli büroları arasında vahid standartlar hazırlanıb. “Yaşıl Kart” sazişi 1953-ci il yanvarın 1-dən qüvvəyə minib. Sazişə əsasən, nəqliyyat vasitələri sahiblərinin mülki məsuliyyəti üzrə sazişin üzvü olan istənilən ölkədə verilmiş sığorta şəhadətnaməsi digər üzv ölkələrinin ərazisində qüvvədədir. 2006-cı ildən Bürolar Şurasının qərargahı Brüsseldə yerləşir. Qeyd edək ki, “Yaşıl Kart” sistemi 50-yə yaxın ölkədə, həmçinin qonşu Rusiya, Türkiyə və İranda qüvvədədir.

Bəzi ölkələrdə zərərə hədd qoyulmur

“Yaşıl Kart” sistemi müştərilər üçün sərfəlidir, lakin sığorta şirkətləri haqda heç də həmişə bunu demək olmur. Bəzi ölkələrdə, zərər limiti müəyyən edilmədiyinə görə, digər ölkələrin sığortaçıları böyük kompensasiyalar ödəməli olurlar. Məsələn, Rusiyada bu səbəbdən bir neçə şirkət bu sistemə üzvlüyünü dayandırıb.

Bu ölkədə “Yaşıl Kart”a 12 avtosığortaçı qoşulmuşdu. Lakin, sonradan “İnqosstrax", "MAKS" və "SOQAZ" kimi iri şirkətlər bundan imtina edib. Səbəbi bəzi ölkələrdə böyük və ya qeyri-məhdud limitlərin qoyulması və bunun nəticəsi olaraq olduqca böyük ziyan çəkilməsidir. Sistemə qoşulan ölkələrdə müxtəlif zərər limitləri müəyyənləşdirilib. Bəiz ölkələrdə isə ümumiyyətlə limit yoxdur. Aşağıdakı cədvəldə bu limitlərlə tanış ola bilərsiniz.

“Yaşıl Kart” sisteminə üzv olan ölkələrdə limitlər