Azərbaycanda iri market şəbəkələrinin sayı sürətlə artır. Fins.az-ın məlumatına görə, hazırda Bakıda 10-a yaxın brendləşmiş şəbəkə fəaliyyət göstərir. Amma onların əksəriyyəti regionlara çıxmağa tələsmir, əhalinin alıcılıq qabiliyyəti daha yüksək olan Bakıda pul qazanmağa üstünlük verirlər. Hərçənd artıq güclənməkdə olan rəqabət yaxın gələcəkdə onları regionlardakı iri şəhərlərə qova bilər. Hələliksə, onlar müxtəlif üsullarla paytaxt müştərilərinin loyallığını qazanmağa çalışırlar.

Əsas rəqiblər - «ARAZ» və «Bazar store»dir

Hazırda ölkədə ən böyük marketlər şəbəkəsi «ARAZ» marketləridir. Amma bu şəbəkənin 21 mağazasının hamısı Bakı şəhərindədir. Mağazalarının sayına görə, ikinci yeri «Bazar store» tutur. Əvəzində «Bazar store» regionlarda daha yaxşı təmsil olunub. Hazırda şəbəkəyə daxil olan 13 marketdən 5-i regionlardadır və şirkətin aktivliyini nəzərə alsaq bu hələ son deyil. Bu göstəriciyə görə ikinci yeri «Makromarket» tutur – şəbəkənin Gəncə və Şəmkirdə mağazaları var. Digər şəbəkələr isə regionlara investisiya yatırmağa tələsmir, Bakı şəhərində işləməyə üstünlük verirlər.

Geyim, dəftər-kitab, kosmetika və s.

Market şəbəkələri əhalinin ehtiyaclarına getdikcə daha çox uyğunlaşmağa başlayıblar. Artıq burada təkcə ərzaq malları yox, kütləvi tələbat malları da satılır. Bura geyim, məişət və təsərrüfat malları, dəftərxana ləvazimatları, kosmetika, hətta bağ və zoo məhsullar da aiddir. İri şəbəkələrin demək olar ki, hamısında geyim, dəftərxana ləvazimatı, məişət, kosmetika və təsərrüfat malları tapmaq olar. Hərçənd çeşidlər fərqlənir. Belə ki, yalnız «Bazarstore»də bütün yaş təbəqələri üçün geyim var. Digər şəbəkələrdə isə əsasən uşaq geyimləri satılır.

Fasiləsiz işləyən marketlər

Şəbəkələr arasında qızğın rəqabət özünü iş rejimində göstərir. Supermarketlərin əksəriyyəti saat 8-dən axşam saat 23-dək işləyir. Bəzilərində bu müddət bir saat az və ya çox olur. Bir sıra şəbəkələrin isə tələbatdan asılı olaraq ayrı-ayrı mağazalarında fasiləsiz iş rejimi tətbiq edilib.