Finss.az - Almaniyanın Rheinmetall konserninin rəhbəri Armin Papperger “Der Spiegel”ə verdiyi müsahibədə Avropada illik dövriyyəsi təxminən 40 milyard avro olan müdafiə şirkətlərinin yaradılmasının zəruri olduğunu bildirib.

Onun sözlərinə görə, gələcəkdə müdafiə istehsalının həcmi artsa da, bu, ABŞ-la rəqabət aparmaq üçün kifayət etməyəcək.

Papperger, Fransa və Almaniyanın birgə həyata keçirdiyi MGCS (Main Ground Combat System – Əsas Quru Döyüş Sistemi) tank layihəsinə toxunaraq, son beş ildə layihənin inkişafının “çox mülayim” olduğunu qeyd edib. O, Avropada müdafiə sənayesinin inkişafına mane olan problemlərdən biri kimi istehsalçılara konkret əməkdaşlıq strukturları olmadan proqramların təqdim edilməsini göstərib.

Bundan əvvəl Yunanıstanın milli müdafiə naziri Nikos Dendias da Avropa ölkələrinin Rusiya tanklarına qarşı effektiv müqavimət göstərə bilmədiyini vurğulamışdı. O, həmçinin, Avropa İttifaqında müdafiə büdcəsinin bölüşdürülməsi qaydalarını tənqid edib.

Avropa ölkələrinin müdafiə sənayesini gücləndirmək üçün yeni strategiyalar hazırlaması və daha sıx əməkdaşlığa getməsi gözlənilir.