Şimali Koreya lideri Kim Çen In Nüvə Silahları İnstitutuna və atom silahları üçün nüvə materiallarının istehsalı bazasına baş çəkib. Koreya Mərkəzi Xəbər Agentliyi (KCNA) xəbər verir ki, o, bu materialların istehsalının artırılmasına göstəriş verib.

Finss.az xəbər verir ki, Şimali Koreya lideri nüvə silahı üçün döyüş başlıqlarının istehsalını yoxlayıb. O, həmçinin uranın zənginləşdirilməsi üçün sentrifuqaların sayının artırılması barədə göstəriş verib. Onun fikrincə, arsenalı “eksponensial” artırmaq üçün “indiyə qədər əldə etdiyimiz nailiyyətlərlə kifayətlənməməliyik”.

Kim Çen In iddia edir ki, son vaxtlar “Amerika imperialistləri və onların peyklərindən gələn nüvə təhdidləri daha açıq olur” və “qırmızı xətti keçib”. Onun sözlərinə görə, KXDR “ABŞ-a cavab verə bilmək” üçün “təhlükəsizlik məsələlərini həll etməlidir”. O, “nüvə təhlükələrinə cavab vermək” ehtiyacına əmindir.

Avqust ayında Pxenyanda hər biri dörd raketdən ibarət 250 taktiki ballistik raket buraxılış qurğusunun Cənubi Koreya ilə sərhəddə yerləşən hərbçilərə təhvil verilməsi mərasimi keçirilib. Sentyabr ayında xalqa müraciətində Kim Çen In demişdi ki, KXDR öz nüvə qüvvələrini “dövlətin təhlükəsizliyini təmin etmək üçün istənilən vaxt lazımi şəkildə istifadə etməyə” hazır olmaq üçün “eksponensial” artırmaq niyyətindədir.

Kaira Agayeva 

Finss.az