İslam Dünyası Təhsil, Elm və Mədəniyyət Təşkilatı (ICESCO) və Səudiyyə Məlumat və Süni İntellekt Təşkilatı (SDAIA) İslam dünyası üçün Ər-Riyad Süni İntellekt (AI) Etika Xartiyasını təqdim edib. 

Finss.az xəbər verir ki, Xartiyanın hazırlanmasında məqsəd İslam dünyasının dəyərlərinə və etikasına riayət olunması, inklüziv və davamlı inkişafı, eləcə də bu sahədə beynəlxalq əməkdaşlığın təşviq edilməsidir.

ICESCO-nun Baş direktoru Ər-Riyaddakı Kral Əbdüləziz Beynəlxalq Konfrans Mərkəzində şahzadələrin, nazirlərin, beynəlxalq təşkilatların nümayəndələrinin, habelə dünyanın 100 ölkəsindən aparıcı süni intellekt və texnologiya şirkətlərinin rəhbərlərinin iştirakı ilə SDAIA tərəfindən keçirilən üçüncü Qlobal Süni İntellekt Sammitində (GAIN) Etika Xartiyasını təqdim edib.

Baş direktor qeyd edib ki, İslam dünyası üçün Ər-Riyad Süni İntellekt Etika Xartiyasının istifadəyə verilməsi ICESCO və SDAIA arasında böyük strateji tərəfdaşlığı nümayiş etdirən tarixi bir məqamdır. O, bu münasibətlə təşkilatın Süni İntellekt Etikası üzrə Kafedrasına ev sahibliyi edən Oman Texnologiya və Tətbiqi Elmlər Universiteti (UTAS) də daxil olmaqla, bir sıra ixtisaslaşdırılmış seminarlar vasitəsilə Xartiyanın hazırlanmasına töhfə verən bütün tərəfdaşlara səmimi təşəkkürünü bildirib.

Kaira Agayeva 

Finss.az