Bu həftə ABŞ-ın Ayova ştatında səlahiyyətlilər, bir dərədə 13,600 illik mastodon kəllə sümüyünün aşkar edildiyini elan etdilər.

Finss.az xəbər verir ki, Ayova Ştat Arxeologiya Departamentinin sosial mediada yaydığı məlumatda bildirilir ki, arxeoloqlar Ueyn qraflığında 12 gün davam edən qazıntılar nəticəsində dərənin sahilində yaxşı qorunmuş kəllə sümüyü tapıblar.

"Təxminən iki həftə davam edən qazıntılar zamanı bir neçə mastodon sümüyü tapılıb. Kəllə unikal idi, çünki Ayovada qazılan ilk yaxşı qorunan mastodon (əsasən kəllə) idi", - məlumatda deyilir.

Radiokarbonla aparılan təhlil, kəllənin təxminən 13,600 il əvvəl mövcud olduğunu göstərib. Arxeoloqlar, kəllədə kəsik izləri kimi insan fəaliyyətinə dair hər hansı bir dəlil olub-olmadığını müəyyən etmək üçün sümüyü yaxından araşdıracaqlar.

Mastodonlar, mamontlar və müasir fillərlə əlaqəli tarixdən əvvəlki məməlilər olub və 23 milyon il əvvəl yer üzündə yaşamışlar. Onların nəsli təxminən 10,000 il əvvəl kəsilmişdir, lakin sümükləri Şimali Amerikada zaman-zaman tapılır.

Kaira Agayeva

Finss.az