Dənizkənarı Milli Parkda Yeni illə bağlı xüsusi hazırlıq işləri görülür.

Finss.az bu barədə Dənizkənarı Bulvar İdarəsinin mətbuat xidmətinin rəhbəri Əfsanə Mehdiyevanın açıqlamalarına istinadən xəbər verir.

"Ənənəyə uyğun olaraq bu il də bulvar ərazisində Yeni ilə hazırlıq işləri aparılır. Dənizkənarı Bulvar İdarəsi olaraq çalışmışıq ki, bayram əhval-ruhiyyəsini daha yaxşı çatdırmaq və qonaqlarımızın zövqünü oxşamaq üçün hazırlıqları daha geniş miqyasda, yeni və fərqli tərtibatda təqdim edək", - Ə.Mehdiyeva bildirib.

O qeyd edib ki, Milli Parkın əksər hissələri, xüsusilə ziyarətçi axınının sıx olduğu istiqamətlər bayram dekorasiyaları və müxtəlif Yeni il instalyasiyaları ilə bəzədilib:
"Demək olar ki, hər addımbaşı xüsusi işıqlarla bəzədilmiş yolkaları görmək mümkündür. Şəhərimizin ən hündür və ən gözəl Yeni il yolkalarından ikisi məhz bulvar ərazisində yerləşir. Onların hündürlüyü təqribən 20 metrdir".

Ə.Mehdiyeva əlavə edib ki, bulvarın giriş hissələri xüsusi işıq dekorasiyaları ilə bəzədilib. Bundan başqa, Kukla teatrının yaxınlığında Yeni il yarmarkasının təşkil edilməsi nəzərdə tutulur.