Finss.az - Niderlandın “ING Group” şirkəti 2025-ci il üçün Azərbaycanda iqtisadi artım proqnozunu 2,6 %, 2026-cı ildə isə 2,8 % olaraq müəyyən edib.

Bu göstəricilər, şirkətin əvvəlki proqnozları ilə eyni səviyyədə qalıb. Proqnoza əsasən, 2025-ci ilin birinci rübündə iqtisadi artım 2 %, ikinci rübdə 2,5 %, üçüncü və dördüncü rüblərdə isə 3 % təşkil edəcək. 2026-cı ilin son rübündə isə artımın 2 % olacağı gözlənilir.

Azərbaycan hökumətinin proqnozlarına görə, 2025-ci ildə ÜDM-in artımı 3,5 %, 2026-cı ildə isə 2,8 % olacaq. Ötən il Azərbaycanda ÜDM 4 %-dən çox artıb.

BMT, Dünya Bankı, IMF, EBRD, ADB və digər beynəlxalq təşkilatlar da müxtəlif proqnozlar təqdim edib. Məsələn, BMT və Dünya Bankı 2026-cı ildə Azərbaycanda ÜDM artımının 3 % və 2,7 % olacağını gözləyir. IMF və EBRD isə 2025-ci ildə 2,5 %-2,7 % arası artım proqnozlaşdırır.

Bununla yanaşı, “SP Global Ratings” və “Fitch Ratings” agentlikləri də Azərbaycanın iqtisadi artımını 2025-ci ildə 2 % və 2,7 % proqnozlaşdırır, amma 2026-cı ildə yavaşlama gözlənilir.