Risklərin idarə olunması biznes fəaliyyətinin mühüm tərkib hissələrindən biridir.
Bu barədə Fins.az-a “BMG International” innovativ üslublu konsaltinq şirkətinin təsisçisi və CEO-su, iqtisadiyyat, maliyyə və biznes sahəsində ekspert, təcrübəli təlimçi, o cümlədən, "Hazır Mühasib" Platformasının təsisçisi Orxan Məmmədzadə açıqlama verib.
O, bildirib ki, biznesdə risklərin idarə olunması mövzusu birbaşa şirkətin fəaliyyətinin kreditor borclarından nə qədər asılı olması ilə əlaqələndirilir:
"Bizim göstərdiyimiz fəaliyyət birbaşa nisyə satış və ya maliyyə fəaliyyəti ilə əlaqədar olarsa, bu zaman risk göstəricisi artır. Bu riskləri dəyərləndirmək üçün maliyyə sahəsində fəaliyyət göstərən bizneslər şöbələr və departamentlər yaradırlar. Mütəxəssislər tərəfindən riskin dəyərləndirilməsi prosesi, bir şeyin riskini və bu riskin potensial nəticələrini qiymətləndirərək, risklərin idarə olunması və minimalizə edilməsi üçün kritik önəmə malikdir. Bu proses, bir şirkətin, bir layihənin və ya hər hansısa bir fəaliyyətin qarşısında olan təhlükələri və risk faktorlarını müəyyən etməyə kömək edir. Mütəxəssislər riskləri dəyərləndirərək, təşkilatın strateji planlamasına, operativ qərarlarının verilməsinə və maliyyə nəzarətinə kömək edə bilərlər.
Adi ticarət üslubunda riskin idarə olunması düzgün maliyyə proqnozunun tərtib olunması və likvidlik əmsalının qorunub saxlanması ilə kifayətlənə bilər.
Bu prosesin effektiv olması üçün aşağıdakı əsas mərhələlər vacibdir:
- Risklərin tanınması: Bir işdə fəaliyyət göstərərkən qarşılaşa biləcəyimiz riskləri tanımaq ən əsas addımdır. Bu, həm daxili (maliyyə, resurs idarəetməsi, iş prosesləri) və həm də xarici riskləri əhatə edir.
- Risklərin qiymətləndirilməsi: Müəyyən edilmiş riskləri dəyərləndirmək, onların potensial zərər dərəcəsini və ehtimalını qiymətləndirmək vacibdir. Bu, riskin hansı sahələrin məsuliyyətlərinə girə biləcəyini və ya şirkətin ümumi effektivliyinə necə təsir edə biləcəyini anlamağa kömək edir.
- Risklərin idarə edilməsi strategiyalarının təyin edilməsi: Qarşılanan risklərə cavab vermək üçün effektiv strategiyalar təyin etmək vacibdir. Məsələn, təhlükəli bazar şəraitində qiymətləndirmə və ya maliyyə səlahiyyətlərini dəyişmək kimi addımlar atmaq olar.
- Riskin azaldılması və ya qarşısının alınması: Məsləhət görülən risklərə cavab vermək üçün uyğun tədbirlər görmək və bu riskləri azaldmaq üçün daim yeni yollar axtarmaq vacibdir.
- Risk idarə etikası: Bütün bu proseslərin daimi olaraq yenilənməsi və yaxşı idarə edilməsi, şirkətin mənafeyi və uzunmüddətli uğuru üçün vacibdir.
Azərbaycanda biznes mühitində risklərin idarə edilməsi, peşəkarların rəyindən daha çox sahibkarın bilik, bacarıq və iş təcrübəsindən asılıdır.Yaxşı olardı ki, bu sahədə maliyyə işini bilən mütəxəssislərə müraciət olunsun. Bu, daha məqsədyönlü hesab olunur".
