Bundan sonra Azərbaycanın marketinq agentliyi MarLab MMC Türkiyənin məşhur “Argus Pazar Arastirma ve Danismanlik Limited” (Argus Growth Agency) şirkətini Azərbaycanda təmsil edəcək.
Fins.az xəbər verir ki, hər iki şirkət bir neçə ay öncə başlayan danışıqları uğurla yekunlaşdıraraq 19 Fevral 2024-cü il tarixində qarşılıqlı əməkdaşlıq üzrə memorandum imzalayıblar.
“İnkişaf edən iqtisadiyyatımız fonunda Azərbaycan şirkətlərinin sağlam və rəqabətqabiliyyətli böyüməsi üçün beynəlxalq standartlara cavab verən marketinq konsultasiya xidmətlərinin ölkəmizdə əlçatan olmasını təmin etmək istəyirik. Nəzərə alsaq ki, fəaliyyət göstərdiyimiz marketinq sahəsi və ələlxüsus marketinq konsultasiya xidmətləri ölkəmizdə yenidir, daha çox yerli təcrübəyə və mütəxəssislərə istinad edir, “Argus Growth Agency” kimi tanınmış şirkətin və onun beynəlxalq təcrübəli mütəxəssislərinin ümumi işimizə faydasının böyük olacağına inanırıq. Yəni əməkdaşlıq tək yerli şirkətlərimizin inkişafına deyil, eyni zamanda yerli marketinq konsultantların yetişməsinə, beynəlxalq təcrübə əldə etməsinə zəmin yaradacaq”- deyərək MarLab MMC-nin təsisçisi və direktoru Əli Bədəlov qeyd edib.
Argus Growth Agency, şirkətlərin böyümə ilə bağlı problemlərinə həll təklif edən Türkiyənin ilk və yeganə böyümə agentliyidir. Argus Growth Agency-nin arxasında 2006-cı ildə əsası qoyulmuş və çətin bazarlarda bir çox milli və beynəlxalq şirkətlərə brendin strateji idarəedilməsi və tədqiqat xidmətləri göstərən Argus Brand Consultancy and Research irsi var. Argus Türkiyədə Mind-Decoder®, Observor®, Innovation Clinic®, Customer Champions, ValueLinx kimi unikal tədqiqat və biznes idarəetmə modelləri daxil olmaqla, orijinal modellər və texnikalar inkişaf etdirən yeganə xidmət şirkətidir. İndiyədək Argus Growth Agency bir çox milli və beynəlxalq markalara o cümlədən Algida, Beisdorf, Coca Cola, Efes Pilsen, Pepsi – Lipton, Schwarzkopf, Sütaş, Unilever, Enerjisa, Kcell (Telia Sonera Qazaxstan), Koç.net (Vodafone Turkiyə), Ncell (Telia Sonera Nepal), Turkcell, Ucell (Telia Sonera Özbəkistan), Arçelik, Philips Türkiyə, Renault, KFC Türkiyə, Koton, LC Waikiki, McDonalds Türkiyə, QNB Finansbank, Softtech, Star TV, Digiturk, Riot Games Türkiyə, Anadolu Motor, Emaar Square and Residences, Mebe Construction (Rusiya) və s. kimi onlarla fərqli sektorlarda tanınmış şirkətlərə xidmət verib.
Brendin inkişafı, kateqoriya menecmenti, satış kanallarının idarəedilməsi, müştəri təcrübəsinin yaxşılaşdırılması, dəyər zəncirinin dizaynı üzrə həllər axtaran yerli şirkətlərimiz aşağıdakı əlaqə məlumatları üzrə MarLab agentliyinə müraciət edə bilərlər.
