2024-cü ilin yanvar-mart aylarında Bakı şəhərində pərakəndə ticarət dövriyyəsinin həcmi 2023-cü ilin eyni dövrünə nisbətən müqayisəli qiymətlərlə 4,3% artaraq 7 milyard 834,2 milyon manat olub.

Fins.az xəbər verir ki, bu barədə Bakı Şəhər Statistika İdarəsindən bildirilib.

Statistika İdarəsinin məlumatına görə, cari ilin I rübündə ən yüksək pərakəndə ticarət dövriyyəsi Nəsimi rayonunda qeydə alınıb. Bu dövrdə Nəsimi rayonunda 1 milyard 196.4 milyon manatlıq məhsul satılıb ki, bu da ötən ilin müvafiq dövrü ilə müqayisədə 14.3% çoxdur.

Bu siyahıda ikinci yerdə Nizami rayonu gəlir. Belə ki, Nizamidə pərakəndə ticarət dövriyyəsi 902 milyon 342 min manat təşkil edib ki, bu da ötən ilin müvafiq dövrü ilə müqayisədə 0.6% azdır.

Üçüncü yerdə isə Xətai rayonu dayanır. Cari ilin yanvar-mart aylarında Xətaidə pərakəndə ticarət dövriyyəsinin həcmi 853 milyon 607 min manat olub ki, bu da 2023-ci ilin yanvar-mart ayları ilə müqayisədə 6.5% çoxdur.

Qeyd edək ki, hesabat dövründə paytaxtın iki rayonunda pərakəndə ticarət dövriyyəsi azalıb, on rayonunda isə artıb.

Pərakəndə ticarət dövriyyələrinin ən yüksək artım faizi Nəsimi ( 14.3% artım) və Pirallahı (18.3% artım) rayonlarında, azalma faizi isə Nizami ( 0.6% azalma) və Qaradağ ( 3.1% azalma) rayonlarında qeydə alınıb.

Xatırladaq ki, hesabat dövründə Bakıda pərakəndə ticarət şəbəkəsində satılmış ərzaq məhsulları, içkilər və tütün məmulatlarının dəyəri 2023-cü ilin müvafiq dövrünə nisbətən 1% azalaraq 4 milyard 553,1 milyon manata, qeyri-ərzaq məhsullarının həcmi isə 12,9% artaraq 3281,1 milyon manata bərabər olub. Dövriyyənin ümumi həcmində ərzaq məhsulları, içkilər və tütün məmulatlarının xüsusi çəkisi əvvəlki ilin eyni dövrü ilə müqayisədə 3,6% azalaraq 58,1% təşkil edib.

Aşağıdakı cədvəldə hesabat dövründə Bakı şəhərinin rayonları üzrə pərakəndə ticarət dövriyyələrinin həcmi və ötən ilin müvafiq dövrü ilə müqayisədə artıb azalma faizləri verilib.