Xəbərdarlıq işıqları kifayət qədər böyük olmadığı üçün keçən həftə Amerikada 2,2 milyon avtomobili geri çağırmalı olan Tesla, Qırmızı dənizdəki müharibə səbəbiylə maddi təchizatını dayandırdı və Almaniyadakı fabrikində istehsalı tamamilə dayandırdı. Göründüyü kimi, şirkət üçün yaxşı başlamayan 2024-cü il daha böyük fəlakətlər potensialını da daşıyır.

Fins.az xəbər verir ki, Tesla ilin əvvəlindən bəri SP 500 indeksində ən pis nəticə göstərən şirkət olub. Yanvarın 5-də 754 milyard dollar olan səhmlərin ümumi dəyəri 589 milyard dollara düşüb. Bu kütləvi eniş həm də şirkətdə böyük paya malik olan İlon Maskın əfsanəvi sərvətinə zərər verə bilər.

Bu dəfə şirkət Cənubi Koreyada məğlubiyyətlə üzləşib. Yanvar ayında Tesla-nın bütün ölkədə cəmi 1 avtomobil satdığı məlum oldu. Bu avtomobil Model Y kimi qeydiyyata alınıb. Bu rəqəm 2022-ci ilin iyun ayından bəri ən aşağı satış rəqəmi olaraq qeydə alınıb. Ötən il Cənubi Koreyada böyük satışlar həyata keçirən Tesla-nın yaşadığı bu məğlubiyyətin səbəbi ölkədəki inflyasiya dalğası və kifayət qədər enerji doldurma məntəqələrinin olmamasıdır.

Günel Məlikzadə
Fins.az